Hokkeı: Óskemenniń «Torpedosy» fınalǵa shyqty
ASTANA. QazAqparat - Óskemen qalasynyń "Torpedo" xokkeı klýby syrt alańynda "Rýbın" komandasyn (RF, Tómen oblysy) aıqyn basymdyqpen jeńdi.
Osylaısha, torpedolyqtar tórtinshi upaılaryn ıelenip, Joǵary xokkeı lıgasynyń fınalyna shyǵyp otyr, dep xabarlaıdy QazAqparat tilshisi.
Keshegi matchta "Torpedonyń" xokkeıshileri bes birdeı shaıba soqty. Birinshi kezeńde Evgenıı Rymarev esep ashsa, ekinshi jáne úshinshi kezeńde Vladımır Korotkov, Mıxaıl Potıakın, Denıs Ignashın, Maık Dalxeısen jáne Aleksandr Shın kózge túsip, esepti eseledi. Al qarsylastar ekinshi kezeńde soqqan bir shaıbadan ary qaraı asa almady. Qorytyndy esep - 1:5.
Osy oıynnan keıin "Torpedo" jalpy esep boıynsha (4:2) jeńiske jetip, fınalǵa shyqty. Aqtyq synda Óskemenniń xokkeı klýby "Dınamo" komandasymen (Máskeý qalasynyń túbindegi Balashıxadan) kezdesedi. Alǵashqy oıyn sáýirdiń 13-i kúni ótedi. Joǵary xokkeı lıgasynyń erejesine sáıkes, qarsylasty tórt ret jeńý kerek.
Aıta keteıik, 2013 jyly Qaraǵandy qalasynyń "Saryarqa" xokkeı klýby da Joǵary xokkeı lıgasynyń fınalyna jetken bolatyn. Alaıda Bratına kýbogyn ala almady. Degenmen, kelesi chemıonatta qaıtadan top jaryp, kýboktyń ıegeri ári lıganyń chempıony ataǵyna ıe boldy.
