Hokkeı: Óskemenniń «Torpedosy» fınaldyq básekelerdi bastaıdy
ASTANA. QazAqparat - Búgin Joǵary hokkeı lıgasynyń fınaldyq oıyndary bastalady. Óskemen qalasynyń «Torpedo» hokkeı klýby óz alańynda «Dınamo» (Máskeý oblysy, Balashıha qalasy) komandasyn qabyldaıdy. Fınalda qarsylasty tórt ret jeńý kerek, dep habarlaıdy QazAqparat tilshisi.
Aıta ketken jón, irikteý týrnıriniń nátıjesi boıynsha «Torpedo» 109 upaımen (barlyǵy 50 oıynda) oq boıy ozyq shyǵyp, chempıonattyń úzdigi retinde tanylǵan bolatyn. Al Balashıhanyń «Dınamosy» 97 upaı jınady. Sonyń arqasynda jalpytýrnırlik kestede 6-shy orynda ornalasqan edi. Degenmen, pleı-offta dınamolyqtar jaqsy óner kórsetip, turaqty ári senimdi oıyn órnegin kórsetti. Olar aldymen «Nıaftıanıkti» (4:2) joldan taıdyrsa, shırek fınalda «Spýtnıkti» 4:1 esebimen jeńdi. Al jartylaı fınalda «Zaýrale» komandasyn tyrp etkizbeı, 4:0 esebimen utqan.
«Torpedo» bolsa, pleı-offtyń alǵashqy matchynda «Ijstaldi» (4:1) ońaı jeńip ketse, shırek fınalda jankúıerlerdiń júıkesin birshama juqartty. Ol oıynda torpedolyqtar Sankt-Peterbordyń «Dınamosynan» 4:3 esebimen basym tústi. Al jartylaı fınalda «Rýbındi» (4:2) utty.
Osylaısha, kezekti chempıonatta úzdik shyqqan eki komanda «Bratına» kýbogyn sarapqa salyp kórmek. 2013 jyly Qaraǵandy qalasynyń "Saryarqa" xokkeı klýby da Joǵary xokkeı lıgasynyń fınalyna jetken bolatyn. Alaıda «Bratına» kýbogyn ala almady. Degenmen, kelesi chempıonatta qaıtadan top jaryp, 2014 jylǵy «Bratına» kýbogynyń ıegeri ári lıganyń chempıony ataǵyna ıe boldy.
