Hokkeı: Ońtústik Koreıa quramasy ońaı qarsylas pa
NUR-SULTAN. QazAqparat - Búgin Nur-Sultanda shaıbaly hokkeıden álem chempıonatynyń birinshi dıvızıonynyń A tobyndaǵy komandalarynyń úshinshi oıyn kúni ótip jatyr. Atalmysh topta synǵa túsetin Qazaqstan quramasy Ońtústik Koreıamen kezdesedi, dep habarlaıdy QazAqparat tilshisi.
Qos qurama da bıylǵy dúbirli dodany sátti bastady. Alǵashqy eki kezdesýinde jeńiske jetti. Qazaqstan hokkeıshileri aldymen Slovenııany 3:2 esebimen tize búktirse, odan keıin Lıtvadan 3:1 esebimen basym tústi.
Al Ońtústik Koreıa áýeli Vengrııany 5:1 esebimen jeńip, odan keıin Slovenııany 5:3 esebimen qapy qaldyrdy.
Eki qurama álem chempıonaty aldynda Nur-Sultanda 26 sáýir kúni joldastyq kezdesý ótkizdi. Bul oıynda Qazaqstan hokkeıshileri 3:0 esebimen jeńiske jetti.
Aıta keterligi, eki qurama búginge deıin bes márte sheberlik baıqasqan edi. Alǵashqy oıyn 1996 jyldyń 8 aqpanynda óttip, ol joly eki qurama qysqy Olımpıadaǵa irikteý kezeńinde muz aıdynǵa shyqqan edi. Bul kezdesýde bizdiń qurama atalmysh qarsylasyn 9:1 esebimen oısyrata jeńdi.
Odan keıin eki quramanyń joly 2002 jylǵy 10 sáýirde álem chempıonatynyń birinshi dıvızıonynda túıisip, bul joly da Qazaqstan quramasy 10:0 esebimen aıqyn basymdyqpen jeńiske jetti. Jarystyń dál osy satysynda eki qurama 2008 jyldyń 14 sáýirinde taǵy bir márte kezdesip, bizdiń jigitter olardy 5:1 esebimen tize búktirdi.
2013 jyldyń 19 sáýirinde qos qurama taǵy da atalmysh básekede jolyǵyp, bul joly da bizdiń qurama 4:2 esebimen jeńdi. Sońǵy kezdesý 2017 jyldyń 23 sáýirinde Ýkraına astanasy - Kıevte ótti. Degenmen bul kezdesýde bizdiń hokkeıshiler atalmysh qarsylasynan alǵash ret 2:5 esebimen jeńilip qaldy. Sol jyly Ońtústik Koreıa óz tarıhynda tuńǵysh ret álemdegi úzdik quramalar bas qosatyn A dıvızıonynda baq synaýǵa joldama aldy. Alaıda byltyr onda barlyq kezdesýde qarsylastaryna ese jiberip, bıyl qaıtadan birinshi dıvızıonǵa oraldy.
Esterińizge sala ketelik, Qazaqstan quramasy A dıvızıonynda segiz márte baq synaǵan. Sońǵy ret 2016 jyly oınaǵan bolatyn. Ońtústik Koreıa burynǵy jyldarda negizinen tómengi dıvızıondarda oıyn kórsetip keldi. Sońǵy on jylda birinshi dıvızıonnyń A jáne V toptarynda boı kórsetip júr. Sondaı-aq, olar 2018 jyly qysqy Olımpıadanyń fınaldyq kezeńinde oınady. Aıta keterligi, qysqy Olımpıada 2018 jyly Ońtústik Koreıa memleketinde ótken edi.
Ońtústik Koreıa quramasy sapynda sheteldik komandalarda synǵa túsip júrgen hokkeıshiler joq. Olardyń barlyǵy óz eliniń birinshiliginde tájirıbe jınaqtap júr. Bul elde «Anıan Halla», «Demen Kıller Ýeıls», «Haı1» jáne «Ýnıversıtet Ense» komandalary bar.
Atalmysh qurama alǵashqy resmı oıynyn 1979 jyly 16 naýryzda Ispanııaǵa qarsy ótkizip, olardan 1:7 esebimen jeńilip qaldy. Óz tarıhynda 1993 jyly 19 naýryzda Slovenııadan 0:27 esebimen oısyraı jeńilse, 1987 jyly 14 naýryzda Taılandtan 92:0 esebimen basym túsken.
Búgingi Qazaqstan jáne Ońtústik Koreıa quramalary arasyndaǵy kezdesý Nur-Sultan ýaqytymen 19.30-da bastalady. Atalmysh oıyn QazSport telearnasynan tikeleı efırde kórsetiledi.
