Hokkeı: Negizgi qarsylasynyń biri «Neftehımıkten» jeńilgen «Barys» jaǵdaıyn qıyndatyp aldy (FOTO)
ASTANA. QazAqparat - Qurlyqtyq hokkeı lıgasynyń turaqty chempıonatynda Astananyń «Barysy» óz aıdynynda Nıjnekamskiniń «Neftehımık» komandasymen mańyzdy kezdesýin ótkizdi.
Pleı-off básekelerine shyǵýǵa múmkindik beretin Shyǵys konferentsııasynda alǵashqy segizdikke iligý úshin kúresip júrgen qos komanda bul oıynda alty upaı úshin talasty deýge bolady. Osynyń aldynda úsh márte qatarynan jeńilgen «Neftehımıkke» sheginer jer joq edi. Al óz aıdynyndaǵy ótken matchta Ombynyń «Avangardynan» oısyraı utylǵan «Barysqa» da úsh upaı aýadaı qajet-tin. Sondyqtan komandalar saq oınap, birinshi kezeńde esep ashylǵan joq. Ekinshi kezeńde, jalpy oıyn barysynda «Barys» hokkeıshileri áldeneshe ret san basymdylyǵyna ıe bolǵanymen, ony paıdalana almady. Esesine qonaqtar mundaı sátti qur jibermeı, Nıkıta Şıtov esep ashty. Úshinshi kezeńde aıdyn ıelerinen Kevın Dallmen tarazy basyn teńestirgenimen, «Neftehımık» hokkeıshileri qarsy shabýylda «Barystyń» qorǵaýshylaryn qapy qaldyryp, Igor Polygalov jeńis golyn soǵyp ketti.
Sóıtip 2:1 esebimen utyp ketken «Neftehımık» 53 oıynnan keıin 75 upaı jınap, arman bolǵan segizdikke jaqyndaı tústi. Al ázirshe jetinshi orynda turǵan «Barystyń» enshisinde 54 kezdesýden keıin 78 upaı bar. Bul týrda Ekaterınbýrgtiń «Avtomobılısi» de Magnıtogorskide «Metallýrgtan» 2:6 esebimen jeńilgenimen, ol 53 oıynnan keıin 77 upaımen «Barystan» sál qalyp, segizinshi satyda keledi. ıAǵnı Shyǵys konferentsııasynda pleı-off kezeńine qatysýǵa jol ashatyn jetinshi, segizinshi oryndar úshin tartys odan saıyn shıelenisti degen sóz.
Aıta keteıik, astanalyqtar 27 qańtar kúni óz aıdynynda Shyǵys konferentsııasynda 10-ynshy satyda turǵan Chelıabiniń «Traktoryn» qabyldasa, Ombyda «Avangard» «Neftehımıkti» synnan ótkizedi. Al «Avtomobılıst» sol kúni Ekaterınbýrgte Ýfanyń «Salavat ıÝlaev» komandasymen aıdynǵa shyǵady.
