Hokkeı: Lıtva quramasynyń qaýqary qandaı
NUR-SULTAN. Búgin Nur-Sultanda shaıbaly hokkeıden álem chempıonaty birinshi dıvızıony A tobynda kezekti týr oıyndary ótedi. Qazaqstan quramasy Lıtvamen sheberlik baıqasady, dep habarlaıdy QazAqparat tilshisi.
Esterińizge sala ketelik, elordamyzda atalmysh toptaǵy alty qurama top-dıvızıonǵa beriletin jalǵyz joldamany sarapqa salady. Bizdiń qazaqstandyq hokkeıshiler Ońtústik Koreıa, Belarýs, Lıtva, Vengrııa jáne Slovenııamen synǵa túsedi. Lıtva álemdik deńgeıde úzdik qurama sanala qoımaıdy. Olar birde-bir márte top-dıvızıonda baq synap kórgen emes. Kóbinese birinshi dıvızıonnyń tómengi toby sanalatyn V tobynda synǵa túsip júrgeni belgili. Sońǵy ret lıtvalyqtar A tobynda 2010 jyly tóbe kórsetken edi. Sol jyly Avstrııa, Ýkraına, Japonııa, Gollandııa jáne Serbııa quramalarymen kezdesti. Alty qurama arasynda besinshi oryndy qanaǵat tutty.
Lıtva elinde shaıbaly hokkeı sporty joǵary deńgeıde dep aıtýǵa negiz joq. Bıyl bul memlekettiń hokkeı lıgasynda «Energııa», «Hokkeı Panks», «Kaýnas hokkeı» jáne «Gelejınıs Vılkas» komandalary synǵa tústi. Sondaı-aq, «Energııa» komandasy shaıbaly hokkeıden Belarýs chempıonatynyń joǵary lıgasynda oıyn kórsetedi. Ázirge onda eshqandaı joǵary nátıjege qol jetkizip kórgen joq.
Atalmysh qurama bizdiń elimizde ótip jatqan dúbirli dodaǵa Lıtvamen birge AQSh, Fınlıandııa, Ulybrıtanııa, Latvııa, Norvegııa, Belgııa, Germanııa, Shvetsııa, Shveıtsarııa elderinde oınaıtyn hokkeıshilerdi alyp keldi. Degenmen olardyń arasynda álemniń úzdik klýbtarynyń ókilderi joq. Sondyqtan bul dúbirli dodada jankúıer seniminen shyǵaıtyn deńgeıde kórsete almaı otyrǵan jaıy bar. Búginge deıin Belarýs quramasymen kezdesti. Olardan 3:4 esebimen jeńilip qaldy. Lıtva hokkeıshileri aldynda atalmysh toptaǵy ornyn saqtap qalý mindeti tur.
Aıta keterligi, Qazaqstan men Lıtva quramalary búginge deıin 4 márte kezdesken edi. Onyń barlyǵynda bizdiń jigitter basym tústi. Alǵashqy kezdesý 2000 jyldyń 10 aqpanynda ótken qysqy Olımpıadanyń irikteý kezdesýinde qazaqstandyq hokkeıshiler olardy 13:2 esebimen oısyrata jeńdi. Odan keıin eki qurama 2003 jyldyń 16 sáýirinde álem chempıonatynyń birinshi dıvızıonynda A tobynda oınap, bul joly da bizdiń jigitter 13:2 esebimen basym tústi. Eki qurama jarystyń atalmysh satysynda 2009 jyldyń 11 sáýirinde taǵy da jolyqty. Bul joly Qazaqstan quramasy 5:1 esebimen jeńdi. Al 2011 jyly qos qurama taǵy da jarystyń sol satysynda kezdesti. Sol joly Qazaqstan quramasy 7:0 esebimen utty.
Atalmysh kezdesý Nur-Sultan qalasynyń ýaqytymen 16..30-da bastalady. Oıyn QazSport telearnasynan kórsetiledi.
