Hokkeı klýbtaryn bıýdjetten qarjylandyrý 1,2 mlrd teńgeden aspaýy kerek - mınıstr

NUR-SULTAN. QazAqparat – Mádenıet jáne sport mınıstri Aqtoty Raıymqulova kásibı sport klýbtaryn bıýdjetten qarjylandyrý lımıtterin atady, dep habarlaıdy QazAqparat tilshisi.

«Kásibı sporttyq klýbtardyń qyzmetine jumsalyp kelgen qarajattyń bir bóligin buqaralyq jáne balalar sportyna bólý týraly Prezıdenttiń tapsyrmasyn oryndap kelemiz. Buǵan deıin de aıtqanymdaı, onyń kólemi 2020 jyly 55 mlrd teńge boldy. Qazirgi tańda Memleket basshysynyń tapsyrmasy boıynsha úlken jumys júrgizildi. Biz lımıt bekittik. Bul lımıt barlyq oblystarǵa taratyldy», - dedi mınıstr Ortalyq kommýnıkatsııalar qyzmetinde ótken brıfıngte.

Sala jetekshisiniń aıtýynsha, qarjylandyrý shegi ár sport baǵytyna qaraı jeke-jeke rettelgen.

«Mysaly fýtbol nemese hokkeı klýbtaryn qarjylandyrý kólemi 1,2 mlrd teńgeden aspaýy kerek. Qalǵan sport túrlerine qoıylǵan lımıt 450 mln teńgeden aspaýy tıis. Munyń ekonomıkalyq tıimdiligi eleýli bolady. Óıtkeni únemdelgen aqshanyń bári buqaralyq sportty damytýǵa, balalar men jasóspirimder sportyna arnalǵan memlekettik tapsyrystarǵa baǵyttalady», - dedi Aqtoty Raıymqulova