Hokkeı: «Qaztsınk-Torpedo» men «Saryarqa» utyldy
ASTANA. 14 qazan. QazAqparat - Óskemen qalasynyń «Qaztsınk-Torpedo» hokkeı klýby syrt alańda «Rýbın» (Tıýmen) komandasyna jol berip qoıdy.
Bul oıynda qarsylastar esepti birinshi bolyp ashyp, bes mınýttyń ishinde eki shaıbamen alǵa shyqty. Birinshi kezeńde «Qaztsınk-Torpedo» esep aıyrmasyn 1:2-ge qysqartty. Al ekinshi kezeńde tarazy basyn teńestirdi. Úshinshi kezeńniń basynda «Rýbın» taǵy da bir shaıbany soǵyp, shabýyldaryn údetti. «Qaztsınk-Torpedonyń» hokkeıshileri onyń bárin sheberlikpen toıtara bildi. Alaıda qarsylastyń qaqpashysynan aılasyn asyra almady. Qorytyndy esep - 2:3. Qaraǵandy qalasynyń «Saryarqa» hokkeı klýby da utyldy. Komanda óz alańynda «Arıadadan» (Voljsk) 0:3 esebimen jeńildi.
