Hokkeı: «Qaztsınk-Torpedo» qarsylasynan býllıt serııasynda utyldy
ASTANA. 29 qyrkúıek. QazAqparat - Keshe Óskemen qalasynyń «Qaztsınk-Torpedo» hokkeı klýby syrt alańda «Sokol» komandasymen kezdesip, óz qarsylasyna býllıt serııasynda jol berip qoıdy.
Krasnoıarsk qalasynda ótken match asa tartysty ári qyzyqty boldy. Birinshi kezeńnen bastap eki komanda bir-birine tegeýrindi shabýyldar jasap, qaqpashydan óz aılasyn asyrýǵa tyrysty. Degenmen, eki jaqtyń da bekinisi bekem boldy. Oıyn barysynda «Qaztsınk-Torpedo» men «Sokoldyń» hokkeıshileri erejeni buzyp, bir oıynshyǵa artyq jáne kem quramda oınady. Alaıda ol múmkindikterdi de júzege asyra almady. Sodan matchtyń úsh kezeńinde de esep ashylmady. Qosymsha ýaqytta da eshqandaı ózgeris bolǵan joq. Oıyn býllıt serııasyna ulasty. Onda «Sokol» komandasynyń mereıi ústem boldy. Esep - 0:1.
Aıta keteıik, Óskemen qalasynyń «Qaztsınk-Torpedo» hokkeı klýby buǵan deıin birde-bir ret jeńilmeı, qatarynan jeti oıynda jeńiske jetken bolatyn. Búgin býllıt serııasynda utylsa da, bir upaıdy oljalap, Joǵary hokkeı lıgasynyń jalpy týrnırlik kestesinde 21 upaımen kósh bastap tur.
