Hokkeı: «Qaztsınk-Torpedo» hokkeı klýby Saratov komandasyn utty
ASTANA. 6 qazan. QazAqparat - Óskemen qalasynyń «Qaztsınk-Torpedo» hokkeı klýby óz alańynda «Krıstall S» (Saratov) komandasynan basym tústi.
Bul oıynda qarsylastar eki kezeń boıynsha shaıba soǵa almady. «Qaztsınk-Torpedo» bolsa, óz alańynda erkin qımyldap, «Krıstall S» qaqpashysyn eki márte qapy qaldyrdy. Birinshi kezeńniń tórtinshi mınýtynda Evgenıı Rymarev birinshi shaıbasyn, al ekinshi kezeńniń besinshi mınýtynda ekinshi shaıbasyn soǵyp, dýbldyń, ıaǵnı eki birdeı shaıbanyń avtory atandy. Esep - 2:0. Úshinshi kezeńde Andreı Ogorodnıkov esep aıyrmasyn ulǵaıtty. 3:0. Osydan keıin «Qaztsınk-Torpedo» qorǵanysqa kóshti. Al qarsylas komanda baryn salyp, eki shaıbany qaıtara bildi. Biraq odan asa almady. Qorytyndy esep - 3:2. Osylaısha, Óskemen qalasynyń hokkeı klýby taǵy úsh upaıǵa qol jetkizip, barlyǵy 24 upaımen lıganyń jalpy týrnırlik kestesinde birinshi oryndy saqtap qaldy. Al «Krıstall S» komandasy 17-shi orynǵa syrǵyp tústi.
