Hokkeı: «Qaztsınk-Torpedo» eki márte jeńiske jetti
ASTANA. 27 tamyz. QazAqparat - Reseıdiń Qorǵan qalasynda ótip jatqan shaıbaly hokkeıden Nıkolaı Paryshev atyndaǵy memorıaldyń kezekti týrnıri aıasynda Óskemen qalasynyń «Qaztsınk-Torpedo» komandasy ekinshi márte jeńiske jetti.
Keshe óskemendik klýbtyń hokkeıshileri jergilikti «Zaýrale» komandasyn 2:0 esebimen utsa, búgin «Ijstaldi» (Ijevsk) 4:1 esebimen tize búktirdi. Erteń «Qaztsınk-Torpedo» reseılik «Arıada» (Voljsk) komandasymen kúsh synasyp kóredi. Bul oıyn kúndiz saǵat 13:00-de bastalady.
Aıta keteıik, Nıkolaı Paryshev atyndaǵy memorıaldyń kezekti týrnırine tórt komanda - «Qaztsınk-Torpedo» (Óskemen), «Zaýrale» (Qorǵan), «Ijstal» (Ijevsk) jáne «Arıada» (Voljsk) quramalary qatysyp jatyr.
