Hokkeı: Qazaqstannyń jastar quramasy elıtaly dıvızıonǵa shyǵa almady
ASTANA. Jeltoqsannyń 20-sy. QazAqparat /Ernur Aqanbaı/ - Shaıbaly hokkeıden Qazaqstannyń jastar quramasy elıtaly dıvızıonǵa shyǵa almady. Polshanyń Gdansk qalasynda ótip jatqan «V» dıvızıonyndaǵy komandalar arasyndaǵy álem chempıonatynda bizdiń komanda mańyzdy matchta Norvegııadan 2:4 esebimen jeńilip qaldy,
dep habarlaıdy QazAqparat.
«Bizdiń sport» saıtynyń málimetinshe, Qazaqstan quramasy bul chempıonatta Horvatııa, Italııa, Norvegııa, Polsha jáne Belarýs quramalarymen birge bir topta synǵa túsýde. Bizdiń komandanyń aldyna «A» dıvızıonyna shyǵý mindeti qoıylǵan. Jerlesterimiz alǵashqy oıynynda Horvatııany 10:1 esebimen jeńip, chempıonatty qarqyndy bastaǵanymen odan keıingi kezdesýinde Italııadan 3:1 esebimen utylyp qalǵan. Al, úshinshi oıynda Polshadan 6:3 esebimen basym túsken bizdiń komandada elıtaly dıvızıonǵa shyǵýǵa áli de bolsa múmkindik bar edi. Alaıda, tórtinshi mańyzdy oıynda Qazaqstan quramasy Norvegııadan 2:4 esebimen utylyp, joǵarǵy dıvızıonǵa shyǵý múmkindiginen aıyryldy. Chempıonattaǵy qorytyndy kezdesýin jerlesterimiz búgin Belarýs quramasymen ótkizedi.
