Hokkeı: Qazaqstannyń jasóspirim qyzdary aldaǵy qarsylastary anyqtaldy
ASTANA. QazAqparat - Shaıbaly hokkeıden 18 jasqa deıingi sportshylar arasyndaǵy álem chempıonatynda qazaqstandyq jasóspirim qyzdardyń aldaǵy jylǵy qarsylastary anyqtaldy, dep habarlaıdy QazAqparat tilshisi.
2024 jyly qazaqstandyq hokkeıshiler ekinshi dıvızıonnyń A tobynda synǵa túsýge múmkindik aldy. Endi olar Avstralııa, Latvııa, Nıderland, Ulybrıtanııa jáne Túrkııamen sheberlik baıqasady.
Aıta ketsek, budan buryn el quramasy ekinshi dıvızıonynda V tobynda Bolgarııany - 8:1, Jańa Zelandııany - 7:1, Belgııany 5:3, Estonııany 8:0, Islandııany 7:0 esebimen jeńip, ekinshi dıvızıonnyń A tobyna shyqty.
Qorytyndy oıyn kestesinde qazaqstandyq hokkeıshiler 15 upaımen birinshi oryn aldy. Odan keıin Belgııa 11, Islandııanyń 9, Jańa Zelandııa 6, Bolgarııa 4 upaı enshilese, Estonııa barlyǵynan jeńilis tapty.
Foto: icehockey.kz
