Hokkeı: Qazaqstandyq jastar Shveıtsarııaǵa ese jiberdi
NUR-SULTAN. QazAqparat - Búgin Chehııada shaıbaly hokkeıden 20 jasqa deıingi jastar quramalary arasynda álem chempıonaty bastaldy. Atalmysh dodaǵa qatysyp jatqan Qazaqstan jastary Shveıtsarııamen sheberlik baıqasty, dep habarlaıdy QazAqparat tilshisi.
Atalmysh kezdesý tartysty ótti deýge negiz bar. Qazaqstandyq jastar qarsylasymen terezesi teń oıyn kórsetti. Esepti 2-mınýtta Shveıtsarııa sapynan Mettıý Verbýn ashqan edi. Oıynyń 15-mınýtynda qazaqstandyq hokkeıshi Maksım Mýsorov tarazy basyn teńestirdi. Al 18-mınýtta qarsylastar sapynan Jeremı Gerber óz quramasyn taǵy da alǵa shyǵardy.
Ekinshi kezeńde qazaqstandyq jastar jaqsy oıyn órnegimen kózge tústi. Kezdesýdiń 24-mınýtynda Rýslan Demın gol soǵyp, tarazy basy taǵy da teńesti. Shveıtsarııalyq Ioel Zaltsgeber 30-mınýtta óz quramasyn qaıtadan alǵa shyǵarsa, 35-mınýtta Maksım Mýsorov taǵy da esepti teńestirdi.
Úshinshi kezeńde Shveıtsarııa eki shaıba soǵyp, qorytyndy esepti belgiledi. Goldardy Djan-Marko Vetter men Mettıý Verbýn 48 jáne 53-mınýttarda ózderiniń enshisine jazdy. Nátıjesinde qazaqstandyq jastar qarsylasyna 3:5 esebimen jeńilip qaldy.
Esterińizge sala ketelik, qazaqstandyq hokkeıshiler A tobynda synǵa túsedi. Qarsylastary - Fınlıandııa, Shveıtsarııa, Shvetsııa jáne Slovakııa quramalary.
Endi qazaqstandyq jastar 27 jeltoqsanda Slovakııamen kezdesse, odan keıin 29 jeltoqsanda Fınlıandııa, 30 jeltoqsanda Shvetsııa quramalarymen baq talastyrady.
Sondaı-aq, álem chempıonatynda V tobynda Chehııa, Germanııa, Kanada, AQSh jáne Reseı quramalary synǵa túsedi.
Qazaqstan jastar quramasy álem chempıonatyna 1993 jyldan beri qatysyp keledi. Osy kezeńde olar ártúrli dıvızıonda baq synady. Qazaqstandyq hokkeıshiler top-dıvızıonda 1998-2001, 2008-2009 jyldar aralyǵynda synǵa túsken. 2017 jyly Frantsııada ótken birinshi dıvızıonnyń A tobynda kósh bastap, úzdikter qataryna segiz jyldan astam ýaqyttan keıin qaıta oraldy.
