Hokkeı: Qazaqstandyq jastar Shvetsııadan jeńilip qaldy
NUR-SULTAN. QazAqparat - Búgin Chehııada shaıbaly hokkeıden 20 jasqa deıingi jastar quramalary arasyndaǵy álem chempıonatynda Qazaqstan quramasy Shvetsııamen kezdesti, dep habarlaıdy QazAqparat tilshisi.
Búgingi qarsylasymyz osal emes. Jylma-jyl júldegerler qatarynan kórinip keledi. Atalmysh qurama búginge deıin 2 márte altyn, 11 márte kúmis, 5 márte qola júldeger atandy. Sońǵy segiz álem chempıonatynda 4 márte úzdik úshtikten kórindi. Osynyń ózi olardyń áleýeti qandaı ekenin aıǵaqtaıdy. Byltyr qazaqstandyq jastar quramasy atalmysh qarsylasynan 1:4 esebimen jeńilgen edi. Olar byltyr jalpy esepte besinshi orynnan asa alǵan joq.
Eki qurama arasyndaǵy búgingi kezdesýde shved hokkeıshileri alǵashqy mınýttan oıyn tizginin qolǵa aldy. Qazaqstandyq qurama qaqpasyna qatarynan bes shaıba soqty. Aldymen 15 jáne 22-mınýttarda Samýel Fagemo qos goldyń avtory atansa, 24-mınýtta Lınýs Eberg esepti ulǵaıta tústi. Al Nıls Heglander 27, Ionatan Berggren 30-mınýtta taǵy eki shaıba soǵyp ketti. Osydan keıin qazaqstandyq hokkeıshi Oleg Boıko 31-mınýtta esep aıyrmasyn qysqartty. Al 51-mınýtta shvetsııalyq Lýkas Reımond bizdiń qaqpadan sańylaý tapsa, oǵan 53-mınýtta qazaqstandyq Maksım Mýsorov bir golmen jaýap qaıyrdy. Aıta keterligi, bul - Maksımniń álem chempıonatynda soqqan tórtinshi shaıbasy. Ol budan buryn Shveıtsarııa, Slovakııa quramalary qaqpashysyn qapy qaldyrǵan edi. Búgingi kezdesýde Qazaqstan jastary Shvetsııaǵa 2:6 esebimen jol berdi.
Buǵan deıin qazaqstandyq jastar Shveıtsarııadan 3:5 , Slovakııadan 1:3 Fınlıandııadan 1:7 esebimen jeńilip qalǵan edi.
Endi qazaqstandyq jastar 2020 jyldyń 2, 4, 5 qańtar kúnderi álem chempıonatynyń jubanysh kezeńinde V tobynda sońǵy oryn alǵan quramamen synǵa túsedi. Ázirge onyń qandaı komanda ekendigi belgisiz. Byltyr olar Danııany eki oıynda jeńip, top-dıvızıondaǵy ornyn saqtap qalǵan bolatyn.
