Hokkeı: Qazaqstandyq jastar quramasynyń qarsylastary kimder
NUR-SULTAN. QazAqparat - Búgin Chehııanyń Ostrava jáne Trshınets qalalarynda shaıbaly hokkeıden jastar arasyndaǵy álem chempıonaty jalaýyn kóteredi. Atalmysh dodaǵa qazaqstandyq jastar quramasy da qatysady, dep habarlaıdy QazAqparat tilshisi.
Qazaqstandyq hokkeıshiler A tobynda synǵa túsedi. Qarsylastary - Fınlıandııa, Shveıtsarııa, Shvetsııa jáne Slovakııa quramalary. Olardyń qaı-qaısysy da osal qarsylas emes. Sondyqtan qarsylastarymyz jaıynda keńirek málimet bere ketkenimiz artyq bolmas.
Aldymen Fınlıandııa quramasynan bastalyq. Fınlıandııa búgingi kúnge deıin 5 márte chempıon atansa, 4 márte kúmis, 6 márte qola júldeger atanǵan. 2019 jyly atalmysh qurama altynnan alqa taqty. Sondyqtan olar bıyl sol ataǵyn qorǵaý jolynda bar kúshin salatyny anyq. Ótken jyly Fınlıandııa qazaqstandyq jastardan 5:0 esebimen basym túsken edi.
Shvetsııa jylma-jyl júldegerler qatarynan kórinip kele jatqan quramanyń biri sanalady. Atalmysh qurama 2 márte altyn, 11 márte kúmis, 5 márte qola júldeger atandy. Sońǵy segiz álem chempıonatynda 4 márte úzdik úshtikten kórindi. Osynyń ózi olardyń áleýeti qandaı ekenin aıǵaqtaıdy. Byltyr qazaqstandyq jastar quramasy atalmysh qarsylasynan 1:4 esebimen jeńilip qaldy. Olar byltyr jalpy esepte besinshi orynnan asa alǵan joq.
Shveıtsarııa quramasy da eshkimge de ońaı shaǵyla qoımaıdy. Dese de ázirge aýyz toltyryp aıtarlyq jetistigi kóp emes. 1998 jyly jastar arasyndaǵy álem chempıonatynda qola júldege qol sozǵan bolatyn. 2019 jyly Shvıtsarııa tórtinshi oryn aldy.
Taǵy bir qarsylasymyz - Slovakııa búgingi kúnge deıin eki márte qola júldege qol sozdy. Atalmysh qurama álem chempıonatynda negizinde alǵashqy segizdikten jıi kórinip keledi. Byltyr Qazaqstan jastary olardan 2:11 esebimen jeńilip qalǵan edi. Slovakııa 2019 jyly segizinshi oryndy qanaǵat tutty.
Qazaqstan jastar quramasy álem chempıonatyna 1993 jyldan beri qatysyp keledi. Shırek ǵasyrdan beri bizdiń hokkeıshiler ártúrli dıvızıonda baq synady. Bizdiń hokkeıshiler top-dıvızıonda 1998-2001, 2008-2009 jyldar aralyǵynda synǵa túsken. 2017 jyly Frantsııada ótken birinshi dıvızıonnyń A tobynda kósh bastap, úzdikter qataryna segiz jyldan astam ýaqyttan keıin qaıta oraldy.
Bıylǵy álem chempıonaty 2019 jyldyń 26 jeltoqsany men 2020 jyldyń 5 qańtary aralyǵynda ótkiziledi. Toptyq kezeń oıyndary 31 jeltoqsanda máresine jetedi.
Álem chempıonaty 1977 jyldan beri turaqty túrde uıymdastyrylyp keledi. Búgingi kúnge deıin 6 qurama chempıondyq ataqqa qol jetkizdi. Atap aıtqanda, Kanada - 17, Reseı (KSRO men TMD-ny qosa eseptegende) - 13, Fınlıandııa men AQSh - 4, Chehııa (Chehoslovakııany qosa eseptegende) - 3, Shvetsııa - 2 márte altyn medal aldy. Bizdiń qurama top-dıvızıonda 1999 jyly alǵashqy altylyqqa endi. Bul - búgingi kúnge deıingi eń joǵary kórsetkishi. Al 1997 jyly bizdiń jigitter jetinshi orynǵa ıe boldy.
Búgin Qazaqstan jastar quramasy Shveıtsarııa quramasymen sheberlik baıqasady. Kezdesý elorda ýaqytymen 23.10-de QazSport telearnasynan kórsetiledi.
Budan buryn hokkeıden Qazaqstan jastar quramasy álem chempıonatyna qatysatynyn habarlaǵan edik.
