Hokkeı: Qazaqstandyq jastar Fınlıandııa quramasynan jeńildi
NUR-SULTAN. QazAqparat - Búgin Chehııada shaıbaly hokkeıden 20 jasqa deıingi jastar quramalary arasynda álem chempıonatynda Qazaqstan quramasy Fınlıandııamen kezdesti, dep habarlaıdy QazAqparat tilshisi.
Fınlıandııa jastary - atalmysh dodada bas júldeden úmitker quramalardyń biri. Olar byltyr álem chempıony ataǵyna qol jetkizgen edi. Bıyl da sondaı bıikten kórinýdi qalaıdy.
Qazaqstan jastary olarǵa birinshi kezeńde laıyqty qarsylyq kórsete bildi. Oıynnyń 6-mınýtynda fınn hokkeıshisi Patrık Pýıstola esep ashqan bolatyn. Oǵan 10-mınýtta qazaqstandyq Andreı Býıalskıı bir golmen jaýap qaıyrdy. Degenmen qazaqstandyq jastar qarsylasynan bir shaıba jiberip aldy. Ol 14-mınýtta fınlıandııalyq Krıstıan Tanýstyń enshisine jazyldy. Budan keıin qarsylastar qazaqstandyq qurama qaqpasyna qatarynan bes shaıba soǵyp ketti. Ony 21-mınýtta Matıas Mchchellı, 32-mınýtta Aatý Rıatıý, 47-mınýtta Patrık Pýıstola, 53-mınýtta Mıkko Kokkonen, 57-mınýtta Kım Noýskaınen soqty. Osylaısha qazaqstandyq jastar qarsylasynan 1:7 esebimen jeńilip qaldy.
Buǵan deıin qazaqstandyq jastar Shveıtsarııadan 3:5, Slovakııadan 1:3 esebimen jeńilip qalǵan edi. Endi olar 30 jeltoqsanda Shvetsııa quramasymen baq synasady.
Qazaqstan jastar quramasy álem chempıonatyna 1993 jyldan beri qatysyp keledi. Osy kezeńde olar ártúrli dıvızıonda baq synady. Qazaqstandyq hokkeıshiler top-dıvızıonda 1998-2001, 2008-2009 jyldar aralyǵynda synǵa túsken. 2017 jyly Frantsııada ótken birinshi dıvızıonnyń A tobynda kósh bastap, úzdikter qataryna segiz jyldan astam ýaqyttan keıin qaıta oraldy.
