Hokkeı: Qazaqstandyq shabýylshy surmergender qatarynda ekinshi orynda tur
NUR-SULTAN. QazAqparat - Chehııada ótip jatqan shaıbaly hokkeıden 20 jasqa deıingi jastar quramalary arasyndaǵy álem chempıonatynda Qazaqstan quramasynyń shabýylshysy Maksım Mýsorov surmergender kóshinde ekinshi orynda keledi, dep habarlaıdy QazAqparat tilshisi.
Qazaqstan jastar quramasy álem chempıonatynda tórt kezdesý ótkizip, barlyǵynda qarsylastaryna ese jiberdi. Aldymen Shveıtsarııadan 3:5 esebimen jeńilgen qazaqstandyq hokkeıshiler odan keıin Slovakııadan 1:3, Fınlıandııadan 1:7 , Shvetsııadan 2:6 esebimen jol berdi. Atalmysh tórt kezdesýde Maksım Mýsorov tórt goldyń avtory atandy. Surmergender kóshin shved hokkeıshisi Samýel Fagemo 6 golmen bastap tur. Odan keıingi oryndaǵy Maksım Mýsorovtan ózge Robert Djýgan (Slovakııa), Artýr Kalıev, Sheın Pınto (ekeýi - AQSh), Patrık Pýıstola (Fınlıandııa), Lıbor Zabranskı (Chehııa) syndy hokkeıshilerdiń enshisinde tórt-tórt shaıbadan bar.
Qazaqstan jastar quramasy endi 2, 4, 5 qańtar kúnderi Germanııamen jubanysh kezeńinde sheberlik baıqasady.
