Hokkeı: Qazaqstandyq órender «Azııa balalary» oıyndarynda «qola» aldy
ASTANA. QazAqparat - Reseıdiń Sahalın oblysynda «Azııa balalary» sporttyq oıyndarynda hokkeıden 15 jasqa deıingi jasóspirimder quramasy qola júldeger atandy, dep habarlaıdy QazAqparat tilshisi Qazaqstan shaıbaly hokkeı federatsııasyna silteme jasap.
Bizdiń órender qola júlde úshin saıysta Qıyr shyǵys federaldy okrýgi quramasymen synǵa tústi. Qazaqstan quramasy olardy 5:2 esebimen tize búktirdi.
Esterińizge sala ketelik, toptyq kezeńde qazaqstandyq órender úsh oıyn ótkizdi. Aldymen Oral federaldy okrýgi quramasynan 0:4 esebimen jeńilip qaldy. Odan keıin Túrkimenstan jasópirimder quramasynan 34:0 esebimen basym tústi. Sońǵy kezdesýinde ıAkýtııa órenderin de iri eseppen jeńdi. Esep 18:1. Osylaısha bizdiń jas hokkeıshiler jartylaı fınalǵa joldama aldy.
Jartylaı fınalda olarǵa Sibir federaldy okrýgi quramasynyń órenderi jolyqty. Bul joly bizdiń órender qarsylasyna 4:8 esebimen jol berip qoıdy. Al fınaldyq kezdesýde Oral federaldy okrýgi komandasy Qıyr Shyǵys federaldy okrýgi hokkeıshilerin 8:1 esebimen jeńip, chempıondyq ataqqa qol jetkizdi.
«Azııa balalary» oıyny 1996 jyldan beri Halyqaralyq olımpıada komıtetiniń qoldaýymen ótkizilip keledi. Bıyldan bastap tuńǵysh ret halyqaralyq «Azııa balalary» qysqy sport oıyndary jalaýyn kóterdi. Bul sheshim 2016 jyly ıAkýtııada qabyldanǵan edi.
