Hokkeı: Qazaqstan jastary joǵary dıvızıonda ornyn saqtap qala ma
NUR-SULTAN. QazAqparat - Chehııada ótip jatqan shaıbaly hokkeıden 20 jasqa deıingi jastar quramalary arasyndaǵy álem chempıonatynda búgin Qazaqstan quramasy Germanııamen jubanysh kezeńindegi alǵashqy oıynyn ótkizedi, dep habarlaıdy QazAqparat tilshisi.
Germanııa quramasy byltyr birinshi dıvızıonda jeńimpaz atanyp, joǵary dıvızıonda baq synaýǵa múmkindik alǵan edi. Nemis hokkeıshileri V tobynda Kanada, AQSh, Reseı, Chehııa quramalarymen oınady. Bir kezdesýde jeńiske jetken olar qalǵanynda qarsylastar yǵyna jyǵyldy. ÓZ tobynda sońǵy oryndy mise tutty.
Germanııa jastary 1977 jylǵy alǵashqy álem chempıonatynda joǵary dıvızıonda baq synaǵan bolatyn. Sol jyly jalpy esepte jetinshi orynǵa turaqtady. Nemis hokkeıshileri kóp jyldar boıy joǵary dıvızıonda oınaǵanyna qaramastan ázirge tolaıym tabystarǵa qol jetkize almaı keledi. Ázirge eń joǵary jetistigi retinde 1981 jylǵy dodada besinshi oryn alǵanyn aıtýǵa bolady.
Qazaqstan jastar quramasy álem chempıonatyna 1993 jyldan beri qatysyp keledi. Shırek ǵasyrdan beri bizdiń hokkeıshiler ártúrli dıvızıonda baq synady. Bizdiń hokkeıshiler top-dıvızıonda 1998-2001, 2008-2009 jyldar aralyǵynda synǵa túsken. 2017 jyly Frantsııada ótken birinshi dıvızıonnyń A tobynda kósh bastap, úzdikter qataryna segiz jyldan astam ýaqyttan keıin qaıta oraldy. 2018 jyly Qazaqstan jastary jubanysh kezeńindegi eki kezdesýde Danııadan basym túsip, joǵary dıvızıondaǵy ornyn saqtap qalǵan bolatyn. Bizdiń qurama joǵary dıvızıonda 1999 jyly alǵashqy altylyqqa endi. Bul - búgingi kúnge deıingi eń joǵary kórsetkishi. Al 1997 jyly bizdiń jigitter jetinshi orynǵa ıe boldy.
Qazaqstandyq hokkeıshiler bıyl A tobynda synǵa tústi. Toptyq kezeńde Fınlıandııa, Shveıtsarııa, Shvetsııa jáne Slovakııa quramalarymen aıdynǵa shyǵyp, barlyǵynda jeńilip qaldy.
Qazaqstan jastar quramasy álem chempıonatynda tórt kezdesý ótkizip, barlyǵynda qarsylastaryna ese jiberdi. Aldymen Shveıtsarııadan 3:5 esebimen jeńilgen qazaqstandyq hokkeıshiler odan keıin Slovakııadan 1:3, Fınlıandııadan 1:7, Shvetsııadan 2:6 esebimen jol berdi.
Qazaqstan men Germanııa hokkeıshileri arasyndaǵy kezdesý elorda ýaqytymen 15.00-de bastalady. Oıyn QazSport telearnasynan tikeleı efırde kórsetiledi.
Sondaı-aq, búgin, 2 qańtarda shırek fınal oıyndary bastalady. Jarystyń atalmysh satysynda Shveıtsarııa men Reseı, Kanada men Slovakııa, AQSh pen Fınlıandııa, Shvetsııa jáne Chehııa quramalary kezdesedi. Al 4 qańtarda jartylaı fınal ótkizilse, 3 oryn ıegeri men chempıon 5 qańtarda anyqtalady. 2019 jyly Fınlıandııa quramasy altynnan alqa taqqan
