Hokkeı: Qazaqstan jastary Slovakııadan oısyraı utyldy
ASTANA. QazAqparat - Hokkeıden 20 jasqa deıingi jastar quramasy Kanadada ótip jatqan jastar arasyndaǵy álem chempıonatynda Slovakııa quramasynan jeńilip qaldy, dep habarlaıdy QazAqparat tilshisi.
Esterińizge sala ketelik, Qazaqstan quramasy V tobynda synǵa túsip jatyr. Buǵan deıin eki oıyn ótkizip úlgerdi. Aldymen 28 jeltoqsanda Fınlıandııadan 0:5 esebimen jeńildi. Odan keıin AQSh quramasynan 2:8 esebimen súrindi.
Boljam jasaýshylar V tobyndaǵy álsiz qurama búgingi kezdesýde anyqtalady degen joramal aıtqan edi. Sebebi, Slovakııa da buǵan deıin barlyq qarsylasyna ese jiberdi. Úsh oıynda da jeńilistiń aşy dámin tatty. Aldymen 27 jeltoqsanda AQSh-tan 1:2, Shvetsııadan 2:5, Fınlıandııadan 1:5 esebimen jeńilip qaldy.
Slovakııa jastary búgingi kezdesýge baryn saldy. Birinshi kezeńniń ózinde bizdiń qaqpaǵa alty shaıba soǵyp úlgerdi. Oıyn bastalǵanyna nebári 22 sekýnd ótkende Adam Lıshka esep ashty. Arada 10 sekýnd ótkende olardyń qatarynan Adam Rýjıchka taǵy da shaıba soqty. Esep 0:2. Óz qaqpasyna nebári birinshi mınýtta eki shaıba jiberip alǵan bizdiń jastar budan keıin de es jınaı alǵan joq. Adam Rýjıchka 5-mınýtta esepti ústemeleı tússe, 8-mınýtta Andreı Kollar qanjyǵasyn maılady. Al 11-mınýtta Fılıp Krıvoshık, 14-mınýtta Martsel Dlýgosh mergendigimen kózge tústi. Birinshi kezeń osylaısha 6:0 esebimen slovak jastarynyń basymdyǵymen aıaqtaldy.
Ekinshi kezeńde Andreı Kollar 22, Mılosh Roman 27-mınýtta shaıba soǵyp ketti. Esep 8:0. Budan keıin Slovakııa jastary qarqynyn sál báseńsitti. Esesine bizdiń jastar quramasy shaıba soǵýǵa umtyldy. Nátıjesinde 30-mınýtta Artýr Gatııatov bizdiń quramanyń búgingi kezdesýdegi alǵashqy shaıbasyn soqty. Degenmen oǵan 33-mınýtta slovak hokkeıshisi Pavel Regenda bir shaıbamen jaýap qaıyrdy.
Úshinshi kezeńde bizdiń quramanyń belsendiligi baıqaldy. Nátıjesinde 46-mınýtta Artýr Gatııatov qarsylastar qateligin sheber paıdalanyp ketti. Esep 2:8. Atalmysh esep birazǵa deıin saqtalyp turdy. Al 54-mınýtta Martsel Dlagosh búgingi kezdesýdegi óz quramasynyń 10-shy shaıbasyn soqty. Al Andreı Kollar 59-mınýtta qorytyndy esepti belgiledi. Osylaısha Qazaqstan jastary Slovakııadan 2:11 esebimen jeńildi.
Qazaqstan jastar quramasy endi 1 qańtarda Astana ýaqytymen 05.30-da Shvetsııa quramasymen kezdesedi. Shvetsııa quramasy V tobynda kósh bastap tur. Olar buǵan deıingi úsh kezdesýde 27 jeltoqsanda Fınlıandııany 2:1, 28 jeltoqsanda Slovakııany 5:2, 30 jeltoqsanda AQSh-ty overtaımda 5:4 esebimen jeńdi.
Qazaqstan men Shvetsııa jastar quramasynyń kezdesýi Qazsport telearnasynan tikeleı efırde kórsetiledi .
Foto: icehockey.kz
