Hokkeı: Qazaqstan jastary ornyn saqtap qala ma

Bizdiń qurama endi jubanysh kezeńine qatysady. Jarystyń bul kezeńinde A jáne V toptarynda sońǵy oryn alǵan quramalar ózara tartysqa túsedi. Jubanysh kezeńi úsh oıynǵa sozylady. Oıyndar 2, 4, 5 qańtar kúnderi ótkiziledi. Eger eki quramanyń biri qatarynan eki ret jeńiske jetse, jarystyń bul satysy erterek aıaqtalady.

Bizdiń jastarymyz jarystyń bul satysynda Danııamen kezdesetin boldy. Dat hokkeıshileri de barlyq oıynda jeńilistiń aşy dámin tatty. Olar aldymen Kanadadan 0:14, Reseı, Shveıtsarııa, Chehııadan 0:4 esebimen jeńilip qaldy.

Esterińizge sala ketelik, bizdiń jastar da barlyq kezdesýinde qarsylastaryna ese jiberdi.

Atap aıtqanda, Fınlıandııadan 0:5, AQSh-tan 2:8, Slovakııadan 2:11, Shvetsııadan 1:4 esebimen jeńildi.

Danııa quramasy byltyr da top-dıvızıonnyń jubanysh kezeńinde oınady. Ol joly Belarýs jastaryn 5:4, 3:2 (býllıtten) esebimen jeńdi. Osylaısha top-dıvızıondaǵy ornyn saqtap qaldy.

Qazaqstan men Danııa jastar quramasy oıyndary Astana ýaqytymen qańtardyń 2-nen 3-ne qaraǵan kúni saǵat 01.00-de, 4 qańtarda 23.00-de, 5 qańtarda 23.00-de bastalady. Bul oıyndar Qazsport telearnasynan tikeleı efırde kórsetiledi.

Qazaqstan jastary álem chempıonatynyń top-dıvızıonyna segiz jyldyq úzilisten keıin qaıta oraldy. Byltyr Frantsııada ótken birinshi dıvızıon oıyndarynda bizdiń qurama jeńimpaz atanǵan edi. Jalpy, bizdiń jastar quramasy álem chempıonatyna 1993 jyldan beri qatysyp keledi.

Aıta ketelik, bıylǵy álem chempıonatynda shırek fınalda qaı quramalar kezdesetinin anyqtaldy. Endi Reseı men Slovakııa, AQSh pen Chehııa, Shvetsııa men Shveıtsarııa, Kanada men Fınlıandııa kezdesedi. Oıyndar 2 qańtarda ótedi. Odan jeńimpaz bolǵan quramalar 4 qańtarda jartylaı fınalda sheberlik baıqasady. Al 5 qańtar kúni fınal men 3 oryn úshin saıystar bolady.

Foto: icehockey.kz