Hokkeı: Qazaqstan jastary Fınlıandııadan jeńilip qaldy
ASTANA. QazAqparat - Búgin hokkeıden 20 jasqa deıingi Qazaqstan jastar quramasy Kanadadaǵy jastar arasyndaǵy álem chempıonatynda alǵashqy oıynynda Fınlıandııa quramasymen kezdesti, dep habarlaıdy QazAqparat tilshisi.
Elimizdiń 20 jasqa deıingi jastar quramasy álem chempıonatyna 1993 jyldan beri qatysyp keledi. Shırek ǵasyrdan beri bizdiń hokkeıshiler ártúrli dıvızıonda baq synady. Top-dıvızıonda 1998-2011, 2008-2009 jyldar aralyǵynda synǵa tústi. Byltyr Frantsııada ótken birinshi dıvızıonnyń A tobynda kósh bastap, úzdikter qataryna segiz jyldan astam ýaqyttan keıin qaıta oraldy. Frantsııa jerinde overtaımda Germanııany 3:2, býllıtten Latvııany 3:2, Vengrııany 5:3, Avstrııany 3:2 jáne Frantsııany 6:1 esebimen tize búktirdi. Osynyń nátıjesinde álem chempıonatynyń top-dıvızıonynda synǵa túsýge múmkindik aldy.
Bizdiń qurama búgingi kezdesýin sátsiz ótkizdi deýge negiz bar. Negizinde táp-táýir oıyn órnegin kórsetkenmen qarsylas quramanyń shabýylyna laıyqty deńgeıde qarsylyq tanyta alǵan joq.
Qazaqstan jastary alǵashqy kezeńde óz qaqpasyna eki shaıba jiberip aldy. Ony qarsylastar sapynan Otto Latvala - 12, Aarne Talvıtıe 15-mınýtta óziniń enshisine jazdy. Al ekinshi kezeńde fın hokkeıshisi Samýlı Vaınıonpıaıa esepti taǵy golmen ústemeleı tústi. Al úshinshi kezeńde Kaapo Kakko - 47, Aleksı Heponıemı 49-mınýtta qanjyǵasyn maılady. Esep 0:5. Osylaısha bizdiń hokkeıshiler óreskel qatelikterge boı aldyryp jatty.
Bizdiń qurama B tobynda oınaıdy. Qarsylastary - Shvetsııa, Amerıka Qurama Shtaty, Fınlıandııa jáne Slovakııa quramalary.
Qazaqstan jastary endi 29 jeltoqsanda saǵat 9.30-da AQSh quramasymen kezdesedi. Atalmysh kezdesý Qazsport telearnasynan tikeleı efırde kórsetiledi.
