Hokkeı: Qazaqstan jastary Danııadan basym tústi
ASTANA. QazAqparat - Hokkeıden 20 jasqa deıingi Qazaqstan quramasy jastar arasyndaǵy álem chempıonatynyń jubanysh kezeńinde Danııamen kezdesip, olardy 4:3 esebimen tize búktirdi, dep habarlaıdy QazAqparat tilshisi.
Esterińizge sala ketelik, Qazaqstan jastary buǵan deıin V tobynda synǵa tústi. Toptyq kezeńde bizdiń jastar barlyq kezdesýinde qarsylastaryna ese jiberdi. Atap aıtqanda, aldymen Fınlıandııadan 0:5 esebimen jeńilse, odan keıin AQSh-tan 2:8 esebimen utylyp qaldy. Jastarymyz úshinshi kezdesýde Slovakııadan 2:11 oısyraı jeńilse, sońǵy oıynda Shvetsııaǵa 1:4 esebimen jol berdi.
Danııa jastary da barlyq oıynda jeńilistiń aşy dámin tatty. Olar aldymen Kanadadan 0:14, Reseı, Shveıtsarııa, Chehııadan 0:4 esebimen jeńilip qaldy. Osylaısha A tobynda sońǵy oryndy mise tutty. Danııa quramasy byltyr da top-dıvızıonnyń jubanysh kezeńinde oınady. Ol joly Belarýs jastaryn 5:4, 3:2 (býllıtten) esebimen jeńdi. Osylaısha top-dıvızıondaǵy ornyn saqtap qaldy.
Jubanysh kezeńi úsh oıynǵa josparlanǵan. Degenmen ol bir quramanyń eki jeńisine deıin jalǵasady. Oıyndar 2, 4, 5 qańtar kúnderi ótkiziledi.
Búgingi kezdesý bizdiń jastar quramasy úshin sátti bastaldy deýge negiz bar. Alǵashqy mınýttan alǵa qaraı lap qoıǵan qazaqstandyq hokkeıshiler 1-mınýtta birinshi shaıba soǵyp úlgerdi. Komandalas áriptesteri Evgenıı Shınkaretskıı men Andreı Býıalskııdiń bergen pasynan keıin Oleg Boıko qanjyǵasyn maılady. Oǵan danııalyq hokkeıshiler tezirek jaýap qaıtarýdyń jolyn izdedi. Nátıjesinde 9-mınýtta olardyń qatarynan Ionas Rendberg tarazy basyn teńestirdi. Bizdiń jastardan 11-mınýtta Ernar Musabaev shaıba soǵyp, taǵy Qazaqstan quramasy alǵa shyqty.
Ekinshi kezeń asa tartysty ótti. Danııa hokkeıshileri tarazy basyn teńestirýge umtyldy. Dese de bizdiń jastar taǵy da bir shaıbany soǵyp ketti. Ony qurama kapıtany Saıan Danııar 33-mınýtta óte sheber oryndaı bildi.
Úshinshi kezeńde danııalyq hokkeıshiler bir shaıba soǵyp, esep aıyrmasyn qysqartty. Olardyń qatarynan 41-mınýtta Andreas Grýndtvıg bizdiń qorǵaýshylardyń óreskel qateligin sheber paıdalanyp, mergendigin kórsetti. Al 49-mınýtta Artýr Gatııatov qarsylastar qaqpashysyn qapy qaldyrdy. Esep 4:2. Budan keıin Danııa sapynan Malte Setkov 57-mınýtta esep aıyrmasyn qysqartty. Esep 4:3. Qazaqstan quramasy jubanysh kezeńiniń alǵashqy kezdesýinde jeńiske jetti.
Qazaqstan jastary álem chempıonatynyń top-dıvızıonyna segiz jyldyq úzilisten keıin qaıta oraldy. Byltyr Frantsııada ótken birinshi dıvızıon oıyndarynda bizdiń qurama jeńimpaz atanǵan edi.
Aıta keterligi, búgin álem chempıonatynda jartylaı fınal oıyndary ótkiziledi. Jarystyń bul satysynda Reseı men Slovakııa, AQSh pen Chehııa, Shvetsııa men Shveıtsarııa, Kanada men Fınlıandııa kezdesedi.
Qazaqstan men Danııa jastar quramalary arasyndaǵy ekinshi kezdesý endi 4 qańtarda Astana ýaqytymen 23.00-de bolady. Bul oıyn Qazsport telearnasynan tikeleı efırde kórsetiledi
