Hokkeı: Qazaqstan jastary Danııadan basym túsip jatyr
ASTANA. QazAqparat - Dál qazir Kanadanyń Vankýver qalasynda hokkeıden 20 jasqa deıingi jastar arasynda álem chempıonatynyń jubanysh kezeńinde Qazaqstan jastar quramasy Danııany jeńip jatyr, dep habarlaıdy QazAqparat tilshisi.
Budan buryn habarlaǵanymyzdaı, jubanysh kezeńiniń alǵashqy kezdesýinde Qazaqstan jastary atalmysh qarsylasyn 4:3 esebimen jeńdi. Erejege sáıkes bul kezeńde eki jeńiske jetken qurama aldaǵy álem chempıonatynda taǵy da top-dıvızıonda oınaý múmkindigine ıe bolady.
Esterińizge sala ketelik, Qazaqstan jastary buǵan deıin V tobynda synǵa tústi. Toptyq kezeńde bizdiń jastar barlyq kezdesýinde qarsylastaryna ese jiberdi. Atap aıtqanda, aldymen Fınlıandııadan 0:5 esebimen jeńilse, odan keıin AQSh-tan 2:8 esebimen utylyp qaldy. Jastarymyz úshinshi kezdesýde Slovakııadan 2:11 oısyraı jeńilse, sońǵy oıynda Shvetsııaǵa 1:4 esebimen jol berdi.
Sondyqtan da bolar, bizdiń jastar oıyn basynan shabýyl tizginin qolǵa alýǵa tyrysty. Alǵashqy shaıba nebári 35-sekýndta soǵyldy. Ony Saıan Danııar oryndady. Al 4-mınýtta Qazaqstan eki shaıba aıyrmasymen alǵa shyqty. Ol Davyd Makýtskııdiń enshisine jazyldy.
Ázirge Qazaqstan jastary top-dıvızıonda qalý múmkindige jaqyn tur. Qazaqstan jastary álem chempıonatynyń top-dıvızıonyna segiz jyldyq úzilisten keıin qaıta oraldy. Byltyr Frantsııada ótken birinshi dıvızıon oıyndarynda bizdiń qurama jeńimpaz atanǵan edi.
Aıta keterligi, búgin jartylaı fınal oıyndary da ótedi. Onda Reseı men AQSh, Fınlıandııa men Shveıtsarııa jastary kezdesedi. 2019 jyldyń 2 qańtarynda ótken shırek fınalda Reseı Slovakııadan 8:3, AQSh Chehııadan 3:1, Fınlıandııa Kanadadan 2:1, Shveıtsarııa Shvetsııadan 2:0 esebimen basym tústi.
