Hokkeı: Qazaqstan jastary birinshi dıvızıonǵa túsip qaldy
NUR-SULTAN. QazAqparat - Shaıbaly hokkeıden 20 jasqa deıingi álem chempıonatynda Qazaqstan jastar quramasy endi birinshi dıvızıonda baq synaıtyn boldy, dep habarlaıdy QazAqparat tilshisi.
Qazaqstan jastary búgin álem chempıonaty jubanysh kezeńindegi úshinshi oıynda Germanııadan jeńilip qaldy. Esterińizge sala ketelik, budan buryn 2 qańtardaǵy alǵashqy kezdesýde Germanııa 4:0 esebimen basym tússe, 4 qańtarda qazaqstandyq hokkeıshiler olardy 4:1 esebimen tize búktirgen edi. Búgingi oıynda jeńiske jetken qurama top-dıvızıondaǵy ornyn saqtap qalatyn edi.
Nemis hokkeıshileri sońǵy oıynǵa tas-túıin daıyndyqpen shyqqan tárizdi. Kezdesý bastalǵan sátten oıyn tizginin óz qolyna aldy. Birinshi kezeńniń 12-mınýtynda nemis hokkeıshisi Domınık Bokk esep ashsa, ekinshi kezeńniń 30-mınýtynda ol esepti ústemeleı tústi. Al 31-mınýtta Tım Pleıcher, 33-mınýtta Lýkas Raıhel, 34-mınýtta Nıklas Haıntsınger qatarynan úsh shaıba soǵyp ketti. Sońǵy mınýttarda Erık Mak qorytyndy esepti belgiledi. Osylaısha Qazaqstan qarsylasynan 0:6 esebimen jeńilip qaldy.
Qazaqstan jastar quramasy álem chempıonatynda A tobynda tórt kezdesý ótkizip, barlyǵynda qarsylastaryna ese jiberdi. Aldymen Shveıtsarııadan 3:5 esebimen jeńilgen qazaqstandyq hokkeıshiler odan keıin Slovakııadan 1:3, Fınlıandııadan 1:7, Shvetsııadan 2:6 esebimen utyldy.
2018 jyly Qazaqstan jastary jubanysh kezeńindegi eki kezdesýde Danııadan basym túsip, top-dıvızıondaǵy ornyn saqtap qalǵan bolatyn.
