Hokkeı: Qazaqstan jastary alǵashqy kezdesýde jeńiske jete me

Bizdiń qurama B tobynda oınaıdy. Qarsylastary - Shvetsııa, Amerıka Qurama Shtaty, Fınlıandııa jáne Slovakııa quramalary. Al A tobynda Kanada, Chehııa, Reseı, Shveıtsarııa, Danııa quramalary sheberlik baıqasady. Álem chempıonaty oıyndary 2018 jyldyń 26 jeltoqsany men 2019 jyldyń 5 qańtary aralyǵynda ótkiziledi.

Qazaqstan quramasy alǵashqy kezdesýinde 28 jeltoqsanda Astana ýaqytymen 09-30-da Fınlıandııaǵa qarsy ótkizetin bolady. Al dál osy ýaqytta 29 jeltoqsanda AQSh-pen, 31 jeltoqsanda Slovakııamen, 1 qańtarda Shvetsııamen muz aıdynǵa shyǵady. Bıylǵy álem chempıonatynda árbir toptan alǵashqy tórt qurama shırek fınal satysyna joldama alady. Al 2 qańtarda ¼ fınaldyq oıyndar bolsa, onyń jeńimpazdary 4 qańtarda jartylaı fınalda kezdesedi. Al 5 qańtarda álem chempıonatynda altyn medaldi qaı qurama alatyny anyqtalady.

Álem chempıonatynda el namysyn qaqpada Eremeev Demıd, Karataev Denıs, Nýrek Vladıslav, qorǵanysta Danııar Samat, Orehov Valerıı, Shınkaretskıı Evgenıı,Musabaev Ernar, Hrıpkov ıAroslav, Korolev Artem, Muratov Davıd, shabýylda Danııar Saıan, Gatııatov Artýr, Makýtskıı Davyd, Vereşagın Ivan, Jorabek Aıdos, Muratov Batyrlan, Boıko Oleg, Gýseınov Dıas, Mýsorov Maksım, Býıalskıı Andreı, Demın Rýslan, Mıtenkov Dmıtrıı, Tretıakovskıı Danıl qorǵaıtyn bolady. Olar «Snejnye barsy», «Altaı-Torpedo», «Temirtaý» jáne «Altaı» komandalarynda oınaıdy.

Hokkeıden 20 jasqa deıingi jastar arasynda álem chempıonaty 1977 jyldan beri turaqty túrde uıymdastyrylyp keledi. Búgingi kúnge deıin 6 qurama chempıondyq ataqqa qol jetkizdi.

Atap aıtqanda, Kanada 17, Reseı (KSRO men TMD-ny qosa eseptegende) 13, Fınlıandııa men AQSh 4, Chehııa (Chehoslovakııany qosa eseptegende) 3, Shvetsııa 2 márte altyn medal aldy. Bizdiń qurama top-dıvızıonda 1999 jyly alǵashqy altylyqqa endi. Bul - búgingi kúnge deıingi eń joǵary kórsetkishi. Al 1997 jyly bizdiń jigitter jetinshi orynǵa ıe boldy.

Elimizdiń 20 jasqa deıingi jastar quramasy álem chempıonatyna 1993 jyldan beri qatysyp keledi. Shırek ǵasyrdan beri bizdiń hokkeıshiler ártúrli dıvızıonda baq synady. Bizdiń hokkeıshiler top-dıvızıonda 1998-2011, 2008-2009 jyldar aralyǵynda synǵa túsken. Byltyr Frantsııada ótken birinshi dıvızıonnyń A tobynda kósh bastap, úzdikter qataryna segiz jyldan astam ýaqyttan keıin qaıta oraldy. Frantsııa jerinde overtaımda Germanııany 3:2, býllıtten Latvııany 3:2, Vengrııany 5:3, Avstrııany 3:2 jáne Franııany 6:1 esebimen tize búktirdi.

Bizdiń qurama 28 jeltoqsanda saǵat 9.30-da Fınlıandııamen muz aıdynǵa shyǵady. Atalmysh kezdesý Qazsport telearnasynan tikeleı efırde kórsetiledi.