Hokkeı: Qazaqstan jastar quramasynyń qarsylasy belgili boldy

NUR-SULTAN. QazAqparat – Chehııada shaıbaly hokkeıden jastar arasynda ótip jatqan álem chempıonatynda Qazaqstan quramasynyń qarsylasy belgili boldy, dep habarlaıdy QazAqparat tilshisi.

Sergeı Starygınniń shákirtteri elıtalyq topta qalý úshin Germanııa quramasymen kezdesetin boldy.

V tobynda baq synaǵan Germanııa jastary sońǵy oıynynda Reseıge 1:6 esebimen ese jiberdi. Sóıtip olar úsh upaımen sońǵy orynda qaldy.

Munyń aldynda A tobynda barlyq qarsylastarynan jeńilis tapqan Qazaqstan quramasy sońǵy orynda qalǵan edi. Endi qazaqstandyqtar elıtalyq topta óz ornyn saqtap qalý úshin Ostrava qalasynda 2 jáne 4 qańtar kúni Germanııa quramasymen aıdynǵa shyǵady. Match eki jeńiske deıin jalǵasady. Eger esep teń bolǵan jaǵdaıda úshinshi, sheshýshi kezdesý 5 qańtar kúni ótedi.

Budan burynǵy álem chempıonatynda Qazaqstan quramasy dál osyndaı básekede Danııany eki márte utyp (4:0, 4:3), óz ornyn saqtap qalǵan edi. Al Germanııa birinshi dıvızıonda úzdik atanǵan bolatyn.

Qazaqstan – Germanııa matchynyń jeńimpazy elıtaǵa kiretin basqa toǵyz komandamen birge 2020 jyldyń 26 jeltoqsany men 2021 jyldyń 5 qańtary aralyǵynda Kanadada ótetin jastar álem birinshiliginde taǵy da oınaıtyn bolady.

Eske sala keteıik, budan buryn Qazaqstan jastar quramasy elıtalyq topta qala ala ma dep jazǵan bolatynbyz.