Hokkeı: Qazaqstan jastar quramasy álem chempıonatyna qatysady
NUR-SULTAN. QazAqparat – Qazaqstan jastar quramasy Chehııada ótetin álem chempıonatyna qatysady, dep habarlaıdy QazAqparat tilshisi.
Elıtalyq dıvızıondaǵy matchtar Ostrava jáne Trshınets qalalarynda ótedi.
Medaldar úshin barlyǵy on komanda synǵa túsedi. Qazaqstan quramasy Fınlıandııa, Shveıtsarııa, Shvetsııa jáne Slovakııa hokkeıshilerimen oınaıdy.
Ulttyq olımpıada komıtetinen alynǵan málimetke qaraǵanda, Qazaqstan jastar quramasy sporttyq jolyn 1993 jyly bastady. Degenmen alǵashqy tabysqa 1998 jyly qol jetti. Japonııada ótken dúnıejúzilik birinshilikte ataqty oıynshy ári bapker Borıs Aleksandrov jattyqtyrǵan hokkeıshiler qarsylastaryn eki márte jeńdi. Aldymen Slovakııany 5:2 esebimen tize búktirdi. Sodan keıin Kanadany 6:3 esebimen utyp ketti. Jarys qorytyndysynda Kanada, Slovakııa, Germanııany artqa qaldyrǵan Qazaqstan besinshi orynǵa ıe boldy. Sol quramadan jarqyrap shyqqan Nıkolaı Antropov Amerıkaǵa bet alyp, NHL-da «Toronto Meıpl Lıfs» jáne «Atlanta Treshers» klýbtarynyń namysyn qorǵady.
Qazaqstan jastar quramasy tarıhyndaǵy úzdik shabýylshy – Sergeı Aleksandrov. Ol 23 kezdesýde 15 shaıba soǵyp, 6 ret nátıjeli pas berdi.
Bul joly álemdik týrnırge barlyǵy 27 hokkeıshi attansa, sonyń 17-si «Snejnyı Bars» komandasynan alyndy. Ókinishke qaraı, úzdik oıynshylardyń biri, shabýylshy Dıas Gýseınov jaraqatyna baılanysty jarysqa qatysa almaıtyn boldy.
Komandany 2012 jyldan beri Sergeı Starygın baptap keledi.
Qazaqstan jastar quramasy alǵashqy oıynyn 26 jeltoqsan kúni Shveıtsarııamen ótkizedi. Sodan keıin 27-sinde Slovakııamen, 29-ynda Fınlıandııamen, 30-ynda Shvetsııamen aıdynǵa shyǵady. Bulardyń qaı-qaısysy da – myqty qarsylastar. Shırek fınalǵa shyǵý úshin qazaqstandyqtarǵa baryn salýǵa týra keledi. Saǵat 20.00-de bastalatyn matchtardy Qazsport telearnasy kórsetedi.
