Hokkeı: Qazaqstan synǵa túsetin dıvızıondaǵy oıyn kúntizbesi jarııalandy
ASTANA. QazAqparat - Hokkeıden álem chempıonaty birinshi dıvızıony A tobynda synǵa túsetin quramalardyń oıyn kúntizbesi jarııalandy. Bul topta Qazaqstan quramasy bar, dep habarlaıdy QazAqparat tilshisi.
Aıta keterligi, atalmysh oıyndar elordamyz - Astana qalasynda ótkiziledi. Mundaı joǵary deńgeıdegi týrnır bizdiń elimizde alǵash ret ótkizilip otyr. Týrnır bıylǵy 29 sáýir jáne 5 mamyr aralyǵynda oınalady.
Qazaqstan quramasynyń qarsylastary - Slovenııa, Lıtva, Ońtústik Koreıa, Belarýs jáne Majarstan quramalary.
Alǵashqy oıynda bizdiń hokkeıshiler 29 sáýirde Slovenııa quramasymen kezdesedi. Odan keıin 1 mamyrda Lıtva, 2 mamyrda Ońtústik Koreıa, 4 mamyrda Belarýs jáne 5 mamyrda Majarstan quramalarymen sheberlik baıqasady.
Halyqaralyq shaıbaly hokkeı federatsııasy atalmysh júıe boıynsha 2000 jyldan beri jarystar ótkizip keledi. Sodan beri Qazaqstan quramasy birinshi dıvızıonda 11-shi márte synǵa túskeli otyr. 2001-2003 jyldary birinshi dıvızıonda oınaǵan bizdiń qurama 2004-2006 jyldarda A dıvızıonda úzdik quramalar qatarynda boldy. 2007-2009 jyldar aralyǵynda qaıtadan birinshi dıvızıonda baq synady. 2010 jyly A dıvızıonyna shyqqanymen, onda kóp turaqtaı alǵan joq. 2010-2016 jyldar aralyǵynda bir jyl birinshi, bir jyl A dıvızıonynda oınap júrdi. Sońǵy eki jyldan beri úzdikter qataryna qosyla almaı keledi.
Byltyr bizdiń qurama birinshi dıvızıonda oınady. Óz tobynda úshinshi oryndy mise tutty. Bul toptan Ulybrıtanııa men Italııa quramalary A dıvızıonyna joldama aldy.
