Hokkeı: Qazaqstan qyzdary Qytaıdy tize búktirdi
NUR-SULTAN. QazAqparat - Qytaı astanasy - Beıjiń qalasynda shaıbaly hokkeıden qyzdar arasynda Álem chempıonatynyń birinshi dıvızıony V tobyndaǵy sońǵy týr oıyndary ótti. Qazaqstan quramasy Qytaımen kezdesti, dep habarlaıdy QazAqparat tilshisi.
Atalmysh dodada Qazaqstan quramasy sátsiz oıyn kórsetip keledi. Buǵan deıingi eki kezdesýde de qarsylastaryna ese jiberdi. Aldymen Polshadan 3:5 esebimen jeńilip qalǵan edi.
Odan keıin Gollandııaǵa 1:3 esebimen jol berdi.
Al úshinshi kezdesýinde Latvııaǵa býllıtten 1:2 esebimen utyldy.
Tórtinshi týrda Ońtústik Koreıaǵa 1:5 esebimen ese jiberdi.
Dese de búgin qazaqstandyq sportshylar óte jınaqy oıyn kórsete bildi. Aıdyn ıeleri sanalatyn Qytaıǵa qarsy shyqqanymen, kezdesýde esepti qazaqstandyqtar ashty. Oıynnyń 28-mınýtynda Larısa Svırıdova qarsylastar qaqpasynan sańylaý tapty. Al 32-mınýtta Ǵalııa Nurǵalıeva mergendik tanytty. Oǵan 37-mınýtta Qytaı hokkeıshileri jalǵyz ǵana golmen jaýap qaıyra aldy. Kezdesýde Qazaqstan qyzdary atalmysh qarsylasyn 2:1 esebimen tize búktirdi.
Búgin taǵy da eki kezdesý ótkizildi. Gollandııa Polshany 2:0, Ońtústik Koreıa Latvııany 4:1 esebimen jeńdi.
Týrnır barysynda birde-bir upaıdy shashaý shyǵarmaǵan Gollandııa 15 upaı jınap, aldaǵy jyly top-dıvızıonda oıyn kórsetýge múmkindik aldy. Odan keıingi oryndaǵy Ońtústik Koreıa men Polshanyń - 9, Qytaıdyń - 6, Qazaqstannyń 4 upaıy bar. Týrnır barysynda nebári 2 upaı jınaǵan Latvııa keler jyly ekinshi dıvızıonda synǵa túsedi.
Foto : icehockey.kz
