Hokkeı: Qazaqstan qyzdary Gollandııaǵa ese jiberdi
NUR-SULTAN. QazAqparat - Búgin Qytaı astanasy - Beıjiń qalasynda shaıbaly hokkeıden qyzdar arasynda Álem chempıonatynyń birinshi dıvızıony V tobyndaǵy ekinshi týr oıyndary ótti. Qazaqstan quramasy Golllandııamen kezdesti, dep habarlaıdy QazAqparat tilshisi.
Kezdesýde Gollandııa qyzdary alǵashqy bolyp esep ashty. Shaıba 8-mınýtta soǵyldy. Arada úsh mınýttaı ótkende olar esepti ústemeleı tústi. Oıynnyń ekinshi kezeńiniń sońyna taman bizdiń qyzdar óarsylastar qaqpasynan sańylaý tapty. Ony 38-mınýtta Tatıana Korleva óziniń enshisine jazdy. Oıynnyń bitýine sanaýly sekýndtar qalǵanda Gollandııa hokkeıshileri taǵy bir shaıba soǵyp ketti. Kezdesýde bizdiń hokkeıshiler 1:3 esebimen jeńilip qaldy. Osylaısha bizdiń qyzdar qatarynan eki oıyn qarsylastaryna ese jiberip qoıdy.
Budan buryn Qazaqstan qyzdary keshe Polshadan 3:5 esebimen jeńilip qalǵan edi.
Búgin atalmysh topta osy ýaqytqa deıin bir oıyn ótti. Qytaı quramasy Ońtústik Koreıadan 5:2 esebimen basym tústi. Sondaı-aq, búgin Latvııa men Polsha quramalary da ózara sheberlik baıqasady.
Endi kelesi týr oıyndary 9 sáýirde bolady. Bul kúni Qazaqstan men Latvııa, Gollandııa men Qytaı, Ońtústik Koreıa men Polsha quramalary muz aıdynǵa shyǵady.
