Hokkeı: Qazaqstan qyzdar quramasy Polshamen kezdesedi
NUR-SULTAN. QazAqparat - Búgin Qytaı astanasy - Beıjiń qalasynda shaıbaly hokkeıden qyzdar arasynda álem chempıonaty birinshi dıvızıonynyń V tobyndaǵy oıyndar bastalady, dep habarlaıdy QazAqparat tilshisi.
Atalmysh topta Qytaı, Latvııa, Gollandııa, Polsha, Ońtústik Koreıa jáne Qazaqstan quramalary synǵa túsedi. Jeńimpaz bolǵan qurama keler jyly top-dıvızıonǵa joldama alady.
Bizdiń qurama 1999 jylǵa deıin álem chempıonaty oıyndaryna qatysqan joq. 2000 jyly V tobynda birinshi oryn alyp, top-dıvızıonda baq synaýǵa múmkindikke qol jetkizdi. 2001 jyly top-dıvızıonda A tobynda oınady. Nátıjesinde Kanadadan 0:11, Reseıden 2:8, Shvetsııadan 1:3 esebimen jeńildi. Sonyń saldarynan qaıtadan birinshi dıvızıonǵa túsip qaldy.
Bizdiń qurama top-dıvızıonǵa 2005 jyly qaıta oraldy. Onda A tobynda Kanada, Shvetsııa, Reseımen sheberlik baıqasty. Toptyq kezeńde bizdiń qyzdar eki kezdesýde de qarsylastaryna ese jiberip qoıdy. Aldymen Kanadadan 0:13, Shvetsııadan 1:5 esebimen jeńilse, odan keıin Reseımen 2:2 esebimen teń tústi. Budan keıin qyzdar 5-8 oryndar úshin saıysta Qytaıdan 0:3 esebimen jeńilip, odan keıin 7 oryn úshin saıysta Reseıdi býllıtten 2:1 esebimen tize búktirdi. Nátıjesinde top-dıvızıondaǵy ornyn saqtap qaldy.
Al 2007 jyly qyzdar top-dıvızıonnyń toptyq kezeńindegi birinshi satysynda A tobynda AQSh-tan 0:9, Qytaıdan 0:7 esebimen jeńildi. Nátıjesinde jarystyń kelesi satysynda F tobynda Reseıge 0:7, Germanııaǵa 0:3 esebimen ese jiberip, úzdikter qatarynan túsip qaldy.
Bizdiń qurama 2009 jyly top-dıvızıonǵa qaıta oraldy. Bul joly olar táp-táýir nátıjege qol jetkizdi. Jarystyń alǵashqy kezeńinde S tobynda synǵa túsken qyzdar aldymen Fınlıandııadan 0:7 esebimen jeńilip, odan keıin Shveıtsarııany býllıtten 2:1 esebimen tize búktirdi. Jarystyń negizgi satysynda E tobynda Shvetsııadan 0:9, Reseıden 2:9 esebimen jeńildi. Jalpy qorytyndy boıynsha altynshy orynǵa taban tiredi.
Degenmen 2010 jyly qaıtadan birinshi dıvızıonǵa túsip qaldy. Aıta keterligi, sońǵy on jyldan beri bizdiń hokkeıshi qyzdarymyz top-dıvızıonǵa qaıta orala almaı keledi.
Qyzdarymyz 2002 jyly Qysqy Olımpıada oıyndaryna qatysty. Jalpy komandalyq esepte segizinshi oryndy qanaǵat tutty. Qysqy Azııa oıyndarynda bizdiń qurama joǵary tabystarǵa qol jetkizdi. 1996, 1999, 2017 jyldary qola júldeger atansa, 2003, 2007, 2011 jyldary altynnan alqa taqty.
Qazaqstan qyzdar quramasy búgin Polshamen sheberlik baıqasady. Odan keıin 7 sáýirde Gollandııamen, 9 sáýirde Latvııamen, 10 sáýirde Ońtústik Koreıamen oınaıdy. Al 12 sáýirde Qytaımen sheberlik baıqasady.
Búgingi Qazaqstan men Polsha qyzdar quramalary arasyndaǵy kezdesý elorda ýaqytymen saǵat 18.00-de bastalady.
