Hokkeı: Qazaqstan qyzdar quramasy Polshadan jeńilip qaldy
NUR-SULTAN. QazAqparat - Búgin Qytaı astanasy - Beıjiń qalasynda shaıbaly hokkeıden qyzdar arasynda Álem chempıonatynyń birinshi dıvızıony V tobyndaǵy oıyndar bastaldy. Qazaqstan quramasy Polshamen kezdesti, dep habarlaıdy QazAqparat tilshisi.
Aıta keteıik, V tobynda Qazaqstan, Qytaı, Latvııa, Gollandııa, Polsha jáne Ońtústik Koreıa quramalary oınaıdy. Jeńimpaz bolǵan qurama keler jyly top-dıvızıonǵa joldama alady.
Búgingi kezdesýde alǵashqy shaıba 3-mınýtta soǵyldy. Ony polıak hokkeıshisi Karloına Pochınevska soqty. Ol 6-mınýtta esepti ústemeleı tústi. Budan keıin Qazaqstan quramasy sapynan Darıa Moldabaı 9-mınýtta esep aıyrmasyn qysqartty. Al 19-mınýtta Polsha quramasynan Magdalena Chaplık bizdiń qaqpadan taǵy sańylaý taýyp ketti. Esep - 3:1.
26-mınýtta Karloına Pochınevska kezekti ret mergendik tanytty. 34-mınýtta bizdiń quramadan Anastasııa Orazbaeva shaıba soǵa aldy. 58-mınýtta Magdalena Chaplık taǵy bir shaıba soqsa, oǵan oıynnyń bitýine sanaýly sekýndtar qalǵanda Malıka Aldabergenova bir shaıbamen jaýap berdi.
Bul kezdesýde Qazaqstan quramasy 3:5 esebimen qarsylasyna ese jiberdi.
Búgin atalmysh topta taǵy eki kezdesý ótti. Qytaı Latvııany - 3:0, Gollandııa Ońtústik Koreıany 5:2 esebimen jeńdi.
Endi Qazaqstan quramasy 7 sáýirde Gollandııamen, 9 sáýirde Latvııamen, 10 sáýirde Ońtústik Koreıamen oınaıdy. Al 12 sáýirde Qytaımen sheberlik baıqasady.
