Hokkeı: Qazaqstan qyzdar quramasy alǵashqy upaıdy enshiledi
NUR-SULTAN. QazAqparat - Qytaı astanasy - Beıjiń qalasynda shaıbaly hokkeıden qyzdar arasynda Álem chempıonatynyń birinshi dıvızıony V tobyndaǵy úshinshi týr oıyndary ótti. Qazaqstan quramasy Latvııamen kezdesti, dep habarlaıdy QazAqparat tilshisi.
Atalmysh dodada Qazaqstan quramasy sátsiz oıyn kórsetip keledi. Buǵan deıingi eki kezdesýde de qarsylastaryna ese jiberdi. Aldymen Polshadan 3:5 esebimen jeńilip qalǵan edi. Odan keıin Gollandııaǵa 1:3 esebimen jol berdi.
Búgingi kezdesýde de jeńiske jete alǵan joq. Oıynnyń negizgi kezeńi 1:1 esebimen teń aıaqtaldy. Latyshtar sapynan 3-mınýtta Leva Peterson shaıba soqsa, oǵan 10-mınýtta qazaqstandyq Malıka Aldabergenova bir shaıbamen jaýap berdi. Oıyn sońyna deıin osy esep ózgergen joq. Overtaımda da jeńimpaz anyqtalmady. Býllıtte Latvııanyń joly boldy.
Aıta keteıik, búgin V tobynda taǵy eki oıyn ótti. Gollandııa Qytaıdy 4:0 esebimen tize búktirse, Ońtústik Koreıa Polshadan 4:3 esebimen basym tústi.
Atalmysh topta toǵyz upaımen Gollandııa kósh bastap tur. Odan keıingi oryndardaǵy Polsha men Qytaıdyń enshisinde alty-alty upaıdan bar. Al Ońtústik Koreıa, Latvııa 2 upaı enshilegen. Ázirge Qazaqstan qorjynynda - 1 upaı.
Tórtinshi týr oıyndary 10 sáýirde ótedi. Bul kúni Latvııa men Gollandııa, Qytaı men Polsha, Qazaqstan men Ońtústik Koreıa kezdesedi.
