HOKKEI: Qazaqstan quramasy tartysty matchta Chehııaǵa ese jiberdi
ASTANA.QazAqparat - Máskeý qalasynda hokkeıden ótip jatqan álem chempıonatynda Qazaqstan quramasy dúnıe júzindegi myqty komandalardyń biri Chehııamen kúsh synasty.
Buǵan deıin Andreı Nazarovtyń shákirtteri Shveıtsarııany býllıt serııasynda utqannan keıin qatarynan úsh márte jeńilis tapsa, chehııalyqtar tórt kezdesýinde de qarsylastaryn tize búktirgen edi. Álem chempıonattarynda Qazaqstan men Chehııa quramalary eki ret kezdesip, sonyń ekeýinde de qazaqstandyqtar utylyp, birde-bir gol soǵa almaǵan edi. Sondyqtan bul matchty da chehııalyqtar ońaı utatyndaı kóringen. Birinshi kezeńde 14-mınýtta chehııalyq shabýylshy Tomash Plekanets esep ashty. Ekinshi taımda qos komanda da qaqpaǵa birdeı soqqy jasaǵandarymen, esep ózgergen joq. Sheshýshi, úshinshi kezeńde 42-mınýtta T.Plekanets taǵy da mergendik tanytyp, esepti 2:0-ge jetkizdi.
Oıynnyń 55-mınýtynda Naıdjel Doýs gol soǵyp, úmit otyn oıatty. Bul qazaqstandyq hokkeıshilerdiń álem birinshilikterinde Chehııa qaqpasyna engizgen alǵashqy shaıbasy edi.
Match aıaqtalýǵa eki mınýttaı ýaqyt qalǵanda, qazaqstandyqtar qaqpashysyn aıdyndaǵy oıynshyǵa aýystyrdy. Biraq bul esh nátıje bermeı, esesine Robert Koýsal bos qalǵan qaqpaǵa shaıbany syrǵyta saldy. Sóıtip chehııalyqtar 3:1 esebimen kezekti, besinshi jeńisine qol jetkizdi.
Bul básekede Qazaqstan quramasynan Naıdjel Doýs úzdik oıynshy dep tanyldy.
14 mamyr kúni Qazaqstan quramasy negizgi qarsylasy Latvııa komandasymen kezdesedi. Aldaǵy jyly da kúshtiler tobynda baq synaý úshin qazaqstandyqtar latvııalyqtardy qaıtse de utý kerek.
