HOKKEI: Qazaqstan quramasy sheshýshi oıynda Latvııadan jeńilip qaldy
ASTANA. QazAqparat - Hokkeıden álem chempıonatynda toptyq kezeńde Qazaqstan quramasy sheshýshi kezdesýde negizgi qarsylasy Latvııaǵa 1:2 esebimen ese jiberdi.
«Qazsport» telearnasynan tikeleı efırde kórsetkenindeı, qazaqstandyqtar matchty sátti bastap, 4-mınýtta Nıkıta Ivanov esep ashty. Oıynnyń ekinshi kezeńinde 35-mınýtta Roman Savchenkonyń qateliginen keıin Kaspars Daýgavınysh tarazy basyn teńestirdi. Kezdesý aıaqtalýǵa bes mınýt ýaqyt qalǵanda, Marıs Bıchevskıs komandasyn alǵa shyǵardy. Bul oıynda Qazaqstan quramasynyń qaqpashysy Vıtalıı Kolesnık birneshe ret komandasyn goldan qutqaryp qalǵanyn aıtý kerek. Al qazaqstandyq oıynshylar óz múmkindikterin paıdalana almady.
Sóıtip latvııalyqtardyń enshisinde alty upaı bolsa, Andreı Nazarovtyń shákirtteri bar bolǵany eki-aq upaımen óz tobynda sońǵy oryndy ıelenip, kúshtiler dıvızıonynan shyǵyp qaldy.
Qazaqstan quramasy sońǵy kezdesýin 16 mamyr kúni Danııamen ótkizedi, alaıda ol match qazaqstandyqtar úshin eshteńeni de sheshpeıdi.
