Hokkeı: Qazaqstan quramasy Polshadan jeńilip qaldy
NUR-SULTAN. QazAqparat - Shaıbaly hokkeıden Qazaqstan quramasy 2022 jylǵy qysqy Olımpıadaǵa úshinshi irikteý kezeńine shyǵa almady. Olar búgin Polsha quramasynan jeńilip qaldy, dep habarlaıdy QazAqparat tilshisi.
Eki qurama da alǵashqy eki kezdesýde jeńiske jetti. Qazaqstandyq hokkeıshiler Ýkraınadan 8:1 , Nıderlandydan 7:1 esebimen basym tústi. Al Polsha Nılerlandyny 8:0, Ýkraınany 6:1 esebimen tize búktirdi. Sondyqtan búgingi oıynda jeńiske jetken qurama jarystyń kelesi satysyna joldama alatyn edi.
Polsha oıyn basynan shıraq qımylymen kózge tústi. Esepti 7-mınýtta polıak hokkeıshisi Bartosh Shýra ashty. Ekinshi kezeńniń 30-mınýtynda Martın Przygodskı esepti ústemeleı tústi.
Budan keıin qazaqstandyq hokkeıshiler Dastın Boıd arada 17 sekýnd ótkende esep aıyrmasyn qysqartsa, 35-mınýtta Naıdjel Doýs tarazy basyn teńestirdi. Sheshýshi goldy 59-mınýtta polıak quramasynan Matseı Ýrbanovıch soǵyp ketti. Osylaısha Polsha quramasy 3:2 esebimen jeńiske jetti. Endi olar jarystyń kelesi satysynda 27-30 tamyz aralyǵynda Slovakııa, Norvegııa jáne Latvııamen sheberlik baıqasady.
Atalmysh topta búgin Ýkraına Nıderlandydan 3:0 esebimen basym tústi.
Polsha shaıbaly hokkeı federatsııasy 1926 jyly qurylǵan. Búgingi kúnge deıin polıak hokkeıshileri qysqy Olımpıada oıyndarynda 13 márte baq synaǵan. Bul jóninen eń joǵary jetistigi retinde 1932 jylǵy dúbirli dodada tórtinshi oryn alǵandyǵyn aıta ketkenimiz artyq bolmas. Sondaı-aq, olar 1931 jyly Polshanyń Krynıtsa-Zdrýı qalasynda ótken álem chempıonatynda alǵashqy tórtikke taban tiredi. Al 1929 jyly Eýropa chempıonatynda fınalda Chehoslovakııadan 1:2 esebimen jeńilip, kúmis júldeni qanaǵat tutty.
