Hokkeı: Qazaqstan quramasy Lıtvadan basym tústi
NUR-SULTAN. QazAqparat - Búgin Nur-Sultanda shaıbaly hokkeıden álem chempıonatynyń birinshi dıvızıony A tobynda kezekti týr oıyndary ótti. Qazaqstan quramasy Lıtva quramasynan basym tústi, dep habarlaıdy QazAqparat tilshisi.
Biz budan buryn búgingi qazaqstandyqtardyń qarsylasy - Lıtva quramasynyń áleýeti jaıynda jazǵan edik.
Aıta keterligi, buǵan deıingi qos quramanyń ózara kezdesýinde Qazaqstan hokkeıshileri tórt márte jeńiske jetken eken. Búgin sol jeńisti jol jalǵasty. Bizdiń jigitter atalmysh quramany besinshi márte tize búktirdi.
Búgingi kezdesýde Dastın Boıd 10-mınýtta elimizdiń quramasyn alǵa shyǵardy. Al 31-mınýtta Nıkıta Kleşenko mergendik tanytty. Esep 2:0. Al 41-mınýtta Lıtva sapynan Arvıdas Domeıka esep aıyrmasyn qysqartty. Qorytyndy esep 59-mınýtta belgili boldy. Qazaqstan quramasynan Darren Dıts sońǵy mınýtta shaıba soǵyp ketti. Osylaısha, Qazaqstan quramasy 3:1 esebimen jeńiske jetti.
Búgin atalmysh kezdesýden basqa oıyn bolǵan joq. Al keshe Belarýs Vengrııany 3:1, Ońtústik Koreıa Slovenııay 5:3 esebimen tize búktirdi.
Alǵashqy eki týrdan keıin Ońtústik Koreıa, Belarýs jáne Qazaqstan quramalary alty upaıdan jınap, alǵashqy úsh oryndy ózara bólisip tur. Al Slovenııa, Lıtva jáne Vengrııa quramalarynyń enshisinde eshqandaı upaı joq.
Úshinshi týr oıyndary 2 mamyr kúni bolady. Bul kúni Lıtva men Vengrııa, Belarýs pen Slovenııa, Ońtústik Koreıa men Qazaqstan quramalary sheberlik baıqasady.
