Hokkeı: Qazaqstan quramasy birinshi orynǵa kóterildi

Qazaqstandyq hokkeıshiler N tobynda Ýkraına, Nıderlandy jáne Polsha quramalarymen irikteý kezeńiniń kelesi satysyna beriletin jalǵyz joldama úshin talasady. Keshe Qazaqstan quramasy Ýkraınadan 8:1 esebimen basym tústi . Al Nıderlandy hokkeıshileri Polshaǵa 0:8 esebimen ese jiberdi.

Nıderland shaıbaly hokkeı federatsııasy 1935 jyly tusaýyn kesken. Alǵashqy qurylǵan jyly álem chempıonatynda baq synap, eń sońǵy oryndy qanaǵat tutty. Bul qurama 1980 jyly Olımpıada oıyndarynda jalpy komandalyq esepte segizinshi orynǵa qol jetkizdi. Álem chempıonatynda 1950, 1981 jyldary segizinshi oryn aldy. Aıta keterligi, Nıderland quramasy búgingi kúnge deıin 7 márte kezdesti. Onyń barlyǵynda qazaqstandyq hokkeıshiler jeńiske jetti. Halyqaralyq shaıbaly hokkeı federatsııasynyń 2019 jylǵy kórsetkishi boıynsha álemdik reıtıngte 28-orynda tur.

Búgingi kezdesýde qazaqstandyq hokkeıshiler oıyn tizginin óz qolyna aldy. Alǵashqy mınýttan qarsylastar qaqpasy mańynda jıi boı kórsetti. Nebári 1-mınýtta qazaqstandyq hokkeıshi Djessı Bleker esep ashsa, 8-mınýtta Darren Dıts esepti ulǵaıta tústi. Al 10-mınýtta Evgenıı Rymarev mergendik tanytyp, qazaqstandyq qurama qarsylasynan birinshi kezeńde 3:0 esebimen basym tústi.

Ekinshi kezeńniń 22-mınýtynda Valerıı Orehov nıderlandylyq hokkeıshiler qaqpasyn dál kózdedi. Oıynnyń 37-mınýtynda nıderlandylyqtar bir golmen jaýap qaıyrdy. Qazaqstandyq Talǵat Jaılaýov 53, 58-mınýttarda qarsylastar qaqpashysyn qapy qaldyrdy. Búgingi oıynda Qazaqstan quramasy qarsylasyn 7:1 esebimen jeńdi. Qazaqstandyq hokkeıshiler óz tobynda birinshi orynǵa kóterildi.

Endi Qazaqstan quramasy 9 qańtarda Polshamen kezdesti. Polsha búgin Ýkraınany 6:1 esebimen tize búktirdi.

Іrikteý kezeńiniń fınaldyq satysyna joldama alý úshin qazaqstandyq hokkeıshiler óz tobynda birinshi oryn alýy tıis. Jarystyń atalmysh satysynda qazaqstandyq hokkeıshiler 2020 jyldyń 27-30 tamyzy aralyǵynda Slovakııa, Norvegııa, Latvııamen sheberlik baıqasady.

Qazaqstan quramasy Qysqy Olımpıada oıyndary tarıhynda eki márte baq synaǵan bolatyn. 1998 jyly shırek fınalǵa deıin jetse, 2006 jyly jalpy esepte toǵyzynshy oryn aldy.