Hokkeı: Qazaqstan quramasy álem chempıonatynyń altynyn alyp, joǵary dıvızıonǵa oraldy
ASTANA. 25 sáýir. QazAqparat /Qanat Mámetqazyuly/ - Shaıbaly hokkeıden Qazaqstan erler qurama komandasy álem chempıonatynyń Birinshi dıvızıonynda «V» toby boıynsha ótken oıyndarda jeńimpaz atanyp, elıtalyq dıvızıonǵa qaıta oraldy.
Kıev qalasynda (Ýkraına) ótken álem chempıonatynyń sońǵy jaýapty matchynda otandastarymyz Ýkraına ulttyq quramasymen kezdesip, overtaımda 3:2 esebimen jeńiske jetti. Osy jeńis bizdiń ulttyq quramanyń birinshi dıvızıondaǵy myqtylyǵyn ǵana aıǵaqtap qoıǵan joq, ulttyq quramamyzdyń kelesi jyly shaıbaly hokkeıden álem chempıonatynyń joǵarǵy dıvızıonynda óner kórsetetin múmkindigin de qanjyǵaǵa baılatty.
Esterińizge sala keteıik, byltyrǵy jyly Qazaqstan quramasy joǵarǵy dıvızıondaǵy oıyndarda oryn alǵan sátsizdikterden soń birinshi dıvızıonǵa túsip qalǵan bolatyn. Al osy jolǵy Qazaqstan, Ýkraına, Estonııa, Ulybrıtanııa, Lıtva jáne Polsha ulttyq quramalary qatysqan Birinshi dıvızıon oıynyndarynda elıtalyq dıvızıonǵa jalǵyz joldama sarapqa túsken bolatyn. Oıyndar nátıjesi boıynsha barlyq qarsylastaryn tize búktirip, altynnan alqa taqqan Qazaqstan hokkeıshileri sol joǵary elıtaly hokkeı alyptarymen ıyq tirestire oınaıtyn múmkinshilikke ıe bolyp otyr. Toqtala ketetin jaıt, 17 -23 sáýir aralyǵynda Ýkraına astanasynda ótken chempıonatta Qazaqstan ulttyq quramasy qarsylastarymen bolǵan bes kezdesýdiń tórteýinde negizgi ýaqytta jeńiske jetse, sońǵy Ýkraınaǵa qarsy ótken oıynda ǵana qosymsha ýaqytta qarsylasty 3:2 esebimen utty.
Chempıonat boıynsha qazaqstandyq hokkeıshi Roman Savchenko eń úzdik qorǵaýshy atandy. Eń úzdik shabýylshy - Oleksandr Materýhın (Ýkraına), eń úzdik qaqpashy - Stıven Merfı (Ulybrıtanııa).
