Hokkeı: Qazaqstan quramasy álem chempıonatyndaǵy ekinshi oıynyn Reseı komandasymen ótkizedi
ASTANA. Mamyrdyń 11-i. QazAqparat - Germanııada shaıbaly hokkeıden ótip jatqan álem chempıonaty aıasynda Qazaqstan quramasy búgin,
mamyrdyń 11-inde ekinshi oıynyn ótkizedi. Muz aıdynynda Qazaqstan komandasy men sońǵy eki álem birinshiliginiń chempıony Reseı quramasy kezdesedi.
Nemistiń Keln qalasynda ótip jatqan chempıonat myńdaǵan jankúıerlerdiń, onyń ishinde qazaqstandyq ókilderdiń de bastaryn qosyp otyr.
Andreı Shaıanov jattyqtyratyn Qazaqstan quramasy birinshi oıynynda Belarýs komandasynan jeńilip qaldy. Oıyndy jap-jaqsy bastap, esepti 2:0-ge jetkizgen qazaqstandyq hokkeıshiler, oıynnyń sońyna qaraı bosańsyp, belarýstarǵa ese jiberip aldy, esep 2:5. Al Reseı quramasy óziniń birinshi kezdesýinde Slovakııa komandasyn 3:1 esebimen jeńdi.
Bizdiń komanda Belarýs, Slovakııa jáne Reseı komandalary kiretin «A» tobynda óner kórsetýde.
