Hokkeı: Qazaqstan quramasy Slovakııaǵa ese jiberdi

ASTANA. KAZINFORM - Búgin, 12 mamyrda shaıbaly hokkeıden álem chempıonaty elıtalyq dıvızıonynda Qazaqstan quramasy ekinshi kezdesýin Slovakııaǵa qarsy ótkizdi. Alǵashqy kezdesýde Qazaqstan quramasy Frantsııany 3:1 esebimen jeńse, Slovakııa Germanııaǵa 3:6 esebimen ese jibergen edi. 

Sol sebepti oıyn bastala sala slovakııalyq hokkeıshiler alǵa qaraı umtyldy. Tolassyz shabýylǵa alǵashqy mınýttarda qazaqstandyq qorǵaýshylar toıtarys bere bildi. 

Oıynnyń 11-mınýtynda slovakııalyq Martın Pospıshıl esep ashsa, odan keıin Martın Fashko-Rýdash 12, Matýsh Sýkel 17-mınýtta esepti ústemeleı tústi. 

Ekinshi kezeńde qazaqstandyq quramanyń belsendiligi baıqaldy. Shabýylshy Álıhan Ásetov 23-mınýtta Slovakııa qaqpasynan sańylaý tapsa, odan keıin qarsylastar sapynan Lıbor Gýdachek 28-mınýtta býllıtten múlt ketken joq. 

Úshinshi kezeńniń alǵashqy mınýtynda slovakııalyq hokkeıshiler basymdyqty arttyrdy. Olardyń qatarynan 41-mınýtynda Martın Pospıshıl taǵy bir márte sheberlik tanytsa, Lýkash Tsıngel 45-mınýtta gol soqty. Al, 51-mınýtta qazaqstandyq Álıhan Ómirbekov esep aıyrmasyn qysqartty. Osylaısha Qazaqstan hokkeıshileri qarsylasyna 2:6 esebimen jeńilip qaldy.

A tobynda Fınlıandııa quramasy Ulybrıtanııany 8:0 esebimen tize búktirdi.

Endi Qazaqstan quramasy aldaǵy oıynyn 14 mamyrda Latvııaǵa qarsy ótkizse, slovakııalyq hokkeıshiler 13 mamyrda AQSh-pen oınaıdy. 

10-26 mamyr aralyǵynda Chehııanyń Praga jáne Ostrava qalalarynda ótip jatqan dúbirli dodada qazaqstandyq hokkeıshiler V tobynda Frantsııa, Slovakııa, Latvııa, Shvetsııa, Germanııa, AQSh jáne Polshamen synǵa túsip jatyr.