Hokkeı: Qazaqstan quramasy búgin Azııa chempıonatyndaǵy alǵashqy oıynyn ótkizedi
ASTANA. KAZINFORM – Búgin shaıbaly hokkeıden Qazaqstan quramasy Ońtústik Koreıanyń Chondjý qalasynda Azııa chempıonatyndaǵy alǵashqy oıynyn Japonııaǵa qarsy ótkizedi.
Bul kezdesý Qazaqstan ýaqytymen 12:00-de bastalyp, «Qazsport» telearnasynan tikeleı efırde kórsetiledi.
Qurlyqtyq básekede Qytaı, Japonııa, Ońtústik Koreıa jáne Qazaqstan quramalary júldeni sarapqa salady.
Oıyndar kestesi (Qazaqstan ýaqytymen):
5 qarasha, 12:00. Japonııa – Qazaqstan;
7 qarasha, 13:30. Qazaqstan - Qytaı;
8 qarasha, 13:30. Qazaqstan - Ońtústik Koreıa.
Qazaqstan hokkeı federatsııasy aldaǵy týrnırge qatysatyn ulttyq quramanyń jattyqtyrýshylar shtabyn jarııalady.
El quramasynyń bas bapkeri qyzmetin «Barys» komandasynyń ókili Talǵat Jaılaýov atqarady. Bapkerdiń kómekshileri retinde klýb júıesiniń ókilderi Konstantın Pýshkarev pen Roman Starchenko jumys isteıdi.
Sonymen qatar shtab quramyna qaqpashylar bapkeri Aleksandr Smelıanets, dene daıyndyǵy jónindegi bapker Igor Elıseev jáne vıdeo bapker Vladıslav Belan endi.
Aıta ketsek, budan buryn shaıbaly hokkeıden Qazaqstan áıelder quramasy 2026 jylǵy Azııa chempıonatynyń qola júldesin ıelengenin habarlaǵanbyz.
Otandastarymyz Ońtústik Koreıadan 5:1 esebimen basym túsip, Japonııadan 0:4, Qytaıdan 1:2 esebimen jeńilip qalǵan edi.