HOKKEI: Qazaqstan elıtalyq dıvızıonǵa joldama aldy
ASTANA. QazAqparat - Hokkeıden álem chempıonatynyń І dıvızıonynda synǵa túsip jatqan Qazaqstan quramasy elıtalyq topqa joldama aldy. Mundaı nátıjege hokkeıshilerimiz Polshamen bolǵan tórtinshi oıynnan keıin qol jetkizdi.
Atalǵan kezdesýde Qazaqstan 3:2 esebimen jeńiske jetti, dep habarlaıdy egemen.kz. Oıynnyń birinshi kezeńinde esep ashylǵan joq. Ekinshi kezeńde Qazaqstan eki shaıba soqsa, qarsylastary bir nátıjeli soqqymen jaýap qaıtardy. Aldymen, 30-mınýtta hokkeıshimiz Roman Savchenko óz basymdyǵyn tanytty. Al arada 5 mınýt ýaqyt ótkende Roman Starchenko esepti eseledi. Artynsha, ıaǵnı, 36-mınýtta polıaktar esep aıyrmasyn qysqartty. Mergendigimen kózge túsken - Bartolomeı Potsecha. Sheshýshi kezeńde Polsha sapynan Martsın Kolýj enshisine bir shaıba jazdy. 49-mınýtta Polýektov qorǵaǵan qaqpany dál kózdegen ol tarazy basyn teńestirdi. Alaıda, oıynnyń bitýine 4 mınýt qalǵan kezde Roman Savchenko dýbldiń avtory atanyp, komandamyzǵa mańyzdy jeńis syılady. Osylaısha saıys barysynda qatarynan tórt ret jeńiske jetken Qazaqstan quramasy merziminen buryn kelesi jyly álem chempıonatynyń elıtalyq dıvızıonynda oınaý múmkindigine ıe boldy.
Aıta keteıik, І dıvızıonnyń saıysy Polshanyń Krakov qalasynda ótip jatyr. Ol jerde «A» tobynyń quramalary synǵa túsýde. Osyǵan deıin Andreı Nazarovtyń komandasy Ýkraınany 5:2, Vengrııany 5:0 jáne Japonııany 7:2 esebimen jeńdi. Tórt oıynda múmkin bolǵan barlyq 12 upaıdy ıemdengen quramamyz topta jeke-dara kósh bastap keledi. Ekinshi orynǵa 9 upaımen Vengrııa jaıǵassa, úzdik úshtikti 6 upaıy bar Polsha túıindep tur. Al elıtalyq dıvızıonnan basty úmittilerdiń biri bolǵan Italııa 5 upaımen 4-orynda keledi. Sondaı-aq, Azııadaǵy negizgi qarsylasymyz Japonııa da bar bolǵany 5-satyǵa taban tiregen. Olar 4 oıynnan 3-aq upaı jınady. Osyǵan deıingi barlyq matchta jeńilgen Ýkraına 1 upaımen eń tómengi orynda tur. Qazaqstan sońǵy oıyndy 25 sáýirde Italııaǵa qarsy ótkizedi.
