Hokkeıden Qazaqstan chempıonaty: pleı-off satysyna shyqqan komandalar anyqtaldy

ASTANA. KAZINFORM - Shaıbaly hokkeıden Qazaqstan chempıonatynyń negizgi kezeńi aıaqtalyp, shırek fınalǵa joldama alǵan komandalar anyqtaldy. Bıyl barlyq komanda 50 oıynnan ótkizdi. 

Kókshetaýdyń «Arlan» komandasy Qazaqstan turaqty chempıonatynyń jeńimpazy atandy. Olardyń shırek fınaldaǵy qarsylasy - atyraýlyq «Beıbarys».

Ekinshi oryn alǵan ózbekstandyq «Hýmo» 1/4 fınalda qaraǵandylyq «Saryarqamen» kezdesse, astanalyq «Nomad» Rýdnyıdyń «Gornıagymen», Óskemenniń «Torpedosy» «Aqtóbemen» oınaıdy. 

Shırek fınaldyń alǵashqy oıyndary 20 aqpanda bastalady. 

Eske salsaq, budan buryn -2026 jylǵy Qysqy Olımpıadada hokkeıden Qazaqstan quramasynyń irikteý satysyndaǵy qarsylastary anyqtaldy.

Qazaqstandyq hokkeıshiler D tobynda Slovakııa, Avstrııa jáne Vengrııamen 2026 jyly Italııada ótetin Qysqy Olımpıadaǵa beriletin joldamany sarapqa salady. Oıyndar 2024 jyldyń 29 tamyz jáne 1 qyrkúıegi aralyǵynda Slovakııa astanasy Bratıslava qalasynda ótkiziledi.