Hokkeı: Qazaqstan birinshiliginde ózbek komandasy oınaýy múmkin
NUR-SULTAN. QazAqparat - Aldaǵy hokkeı maýsymynda Qazaqstan birinshiliginde Ózbekstan komandasy baq synaýy múmkin. Bul jóninde Shaıba.kz saıty málim etti, dep habarlaıdy QazAqparat tilshisi.
Ózbekstan astanasy - Tashkent qalasynda «Hýmo» ataýymen jańa komanda qurylady. Keleshekte atalmysh klýbty Qurlyqtyq hokkeı lıgasynda qatystyrý josparlanyp otyr. Oǵan deıin komanda bir jyl joǵary hokkeı lıgasynda oıyn kórsetedi degen jospar bar.
Komandanyń farm-klýby da jasaqtalady. Bul komanda «Bınokor» atanady. Ol bizdiń elimizdiń birinshiligine qatyspaq. Osylaı bolǵan jaǵdaıda Qazaqstan birinshiliginde baq synaıtyn tuńǵysh sheteldik komanda bolyp sanalady. Qazirgi kúnderi bul baǵytta demeýshiler men Qazaqstan hokkeı federatsııasymen kelissózder júrgizilýde.
Sońǵy jyldary Ózbekstanda shaıbaly hokkeıge mán berilip keledi. Bıyl Tashkent qalasynda 12500 jankúıerge arnalǵan jańa arena paıdalanýǵa berildi. Bul Nur-Sultan qalasyndaǵy «Barys-arena» sport keshenimen shamalas.
Esterińizge sala ketelik, 1970-1980 jyldarda Tashkent qalasynda «Bınokor» komandasy oıyn kórsetti. Atalmysh klýb Keńes odaǵynyń birinshi jáne ekinshi lıgalarynda baq synady.
Bul jóninde Qazaqstan shaıbaly hokkeı federatsııasynyń atqarýshy dırektory Andreı Sachýk atalmysh usynystyń ázirge sóz kúıinde qalyp turǵanyn atap ótti Bizdiń federatsııa tarapynan ózbekstandyq áriptesterine qajetti málimetter jiberilgen. Degenmen oǵan ázirge resmı jaýap berilgen joq.
