Hokkeı: Qazaqstan álem chempıonaty top-dıvızıon oıyndaryn ótkizýi múmkin
NUR-SULTAN. QazAqparat - Qazaqstan aldaǵy ýaqytta shaıbaly hokkeıden álem chempıonaty top-dıvızıony oıyndaryn ótkizýge ótinish berýine múmkindik bar. Bul usynys Halyqaralyq shaıbaly hokkeı federatsııasynyń prezıdenti Rene Fazeldiń Nur-Sultan qalasynda ótkizgen baspasóz máslıhaty barysynda belgili boldy, dep habarlaıdy QazAqparat tilshisi Qazaqstannyń shaıbaly hokkeı federatsııasyna silteme jasap
Nur-Sultan qalasynda 29 sáýir-5 mamyr aralyǵynda shaıbaly hokkeıden birinshi dıvızıon A tobynyń oıyndary ótkizildi. Onda Qazaqstan, Belarýs, Ońtústik Koreıa, Slovenııa, Majarstan jáne Lıtva quramalary synǵa tústi. Nátıjesinde Qazaqstan men Belarýs keler jyly top-dıvızıonda synǵa túsetin boldy. Mártebeli meıman atalmysh týrnırdiń ótkizý deńgeıin joǵary baǵalady.
Eske sala ketsek, shaıbaly hokkeıden top-dıvızıon quramalary arasyndaǵy álem chempıonaty 1920 jyldan beri turaqty túrde ótkizilip keledi. Bıyl álemniń úzdik hokkeı quramalary Slovakııanyń Bratıslva jáne Koshıtse qalalarynda ótkiziledi. Ol 2020 jyly - Shveıtsarııada, 2021 jyly - Belarýs pen Latvııada, 2022 jyly - Fınlıandııada, 2023 jyly - Reseıde, 2024 jyly - Chehııada, 2025 jyly - Shvetsııada jalaýyn kóteredi. Bizdiń elimiz ótinish bildirip jatqan jaǵdaıda 2026 jylǵy dúbirli dodany ótkizý múmkindigin jeńip alýy múmkin.
Aıta keterligi, bul álem chempıonatyn qabyldaýǵa bizdiń elimizde múmkindik bar. Nur-Sultandaǵy «Barys-arena» 12 myń jankúıerdi qabyldaı alady. Al byltyr Almatyda dál sondaı arena paıdalanýǵa berildi.
