Hokkeı: Qazaqstan 2026 jylǵy álem chempıonatyn qabyldaýdan úmitker
NUR-SULTAN. QazAqparat - 2026 jyly Qazaqstan shaıbaly hokkeıden elıtkalyq dıvızıondaǵy álem chempıonatyn qabyldaýdan úmitker memleketter qataryna qosyldy, dep habarlaıdy QazAqparat tilshisi.
Qazir mundaı elderdiń qatarynda Qazaqstannan ózge Norvegııa men Ulybrıtanııa bar. Halyqaralyq hokkeı federatsııasy (IIHF) aldaǵy ýaqytta buryn mundaı dúbirli dodany ótkizbegen elderdi tańdaýǵa nazar aýdaryp otyr.
Bıyl álem chempıonaty Shveıtsarııada ótkizilýi tıis bolatyn. Degenmen koronavırýs pandemııasyna baılanysty atalǵan memleket jarysty qabyldaýdan bas tartty. Álem chempıonatyn 2021 jyly - Belarýs pen Latvııa, 2022 jyly - Fınlıandııa, 2023 jyly Reseı, 2024 jyly - Chehııa, 2025 jyly - Shvetsııa men Danııa qabyldaýǵa daıyn.
Esterińizge sala ketelik, Qazaqstan quramasy 2019 jyly birinshi dıvızıonda ozyq shyǵyp, elıtkalyq dıvızıonǵa joldama alǵan bolatyn.
