Hokkeı: Qaraǵandylyq «Saryarqa» Bratına kýbogynyń fınalynda ekinshi jeńisine qol jetkizdi
ASTANA. QazAqparat - Bratına kýbogynyń aqtyq syn matchtarynda qaraǵandylyq "Saryarqa" hokkeı klýby Túmenniń "Rýbın" komandasynan basym tústi.
Qaraǵandyda ótken kezdesý jergilikti komandanyń jeńisimen 3:2 esebimen aıaqtaldy. Dýshan Gregor jattyqtyratyn qazaqstandyq ujym úshin bul match ońaı bolǵan joq. Alań ıeleri alǵashqy kezeńniń basynda shaıba ótkizip aldy. "Rýbın" hokkeıshisi Denıs Sander qaraǵandylyq komandanyń qaqpashysyn 6-mınýtynda qapyda qaldyryp ketti. "Saryarqa" hokkeıshileri birinshi aınalymda oǵan qarsy jaýap golyn soǵa almaı, tynyǵýǵa ketti.
Ekinshi aınalymda saýatty oınaǵan qarsylastar, utymdy sáttiń birinde óz múmkindikterin paıdalanyp, ekinshi goldy qaqpaǵa toǵytty. Maksım Zıýzıakınniń 25-mınýtta salynǵan goly "Saryarqa" jankúıerleriniń jeńiske degen úmitin basqandaı boldy. Degenmen qaraǵandylyq hokkeıshiler kerisinshe, jigerlerin janı tústi. Ekinshi aınalymnyń sońǵy mınýttarynda qatarynan eki gol salǵan olar, jeńiske degen múmkindikti qaıta alyp berdi. Gol avtorlary - Konstantın Makarov pen Kırıll Lebedev.
Úshinshi kezeń tartysqa toly bolǵanmen, jıyrma mınýttyń ishinde gol salynǵan joq jáne oıyn overtaımǵa ulasty. Biraq onyń ózi uzaqqa sozylmady. Oleg Lomako Qaraǵandy hokkeıshilerine jeńis áperdi. Osylaısha, úsh márte kezdesken "Saryarqa" men "Rýbın" arasyndaǵy serııa 2:1 qaraǵandylyqtardyń basymdyǵymen ótýde. Kelesi oıyn Qaraǵandyda 23 sáýir kúni ótpek.
