Hokkeı: Kanadalyq K. Dallman Qazaqstan azamattyǵyn aldy
ASTANA. 4 aqpan. QazAqparat - Hokkeı federatsııasy arnaıy taratqan málimdeme boıynsha, 31 jastaǵy hokkeıshi Kevın Dallman Qazaqstan azamattyǵyn resmı túrde alǵan.
Endi ol Qazaqstan quramasynyń qorǵaýshysy bolady.
- Dallman Qazaqstanda 2008 jyldan 2012 jylǵa deıin turyp, Astananyń «Barys» hokkeı komandasynda oınaǵan. 2013 jyldyń basynda hokkeıshimen kelisim jasalyp, Qazaqstan quramasyna oınaýǵa shaqyryldy. Hokkeıshiniń Qazaqstan atynan álemdik jarystarǵa qatysýǵa halyqaralyq hokkeı federatsııasy arnaıy ruqsat berdi, - dedi Qazaqstan hokkeı federatsııasynyń menedjeri Shýmı Babaev Azattyq tilshisine.
Kevın Dallman 1981 jyly Kanadanyń Ontarıo qalasynda týǵan. Kanadanyń «Gell Shtorm», AQSh-tyń «Sent-Lýıs Blıýz», «Los Andjeles-Kıng» komandalarynda oınaǵan. «Astana» komandasynda tórt jyl kapıtan boldy. Qazir Reseıdiń «SKA» klýbynda qorǵaýshy bolyp oınaıdy.
Ulttyq qurama menedjeriniń sózine qaraǵanda, Kevın Dallman Avstrııada Qazaqstan quramasy oqý-jattyǵý jıynyn ótkizedi. "Al 7-10 aqpan aralyǵynda Latvııanyń Rıga qalasynda Sochı olımpıadasynyń irikteýine qatysamyz. Qazaqstan hokkeıshileri Latvııa, Frantsııa, Ulybrıtanııa quramalarymen olımpıada joldamasyna talasady. Osy jarysqa Dallman qatysady",- deıdi ol.
Babaevtyń aıtýynsha, Kevın Dallmann Qazaqstanda bes jyl turǵan, sondyqtan azamattyq alýdan esh qıyndyq bolmaǵan.
